Thyroid

Thyroid hi Mizo tawngah a awm chiah lo a, Awrpuar kan ti mai thin a, tunlai thangtharte phei chuan awrpuar pawh an hmu ngai meuh tawh lo ang. Awr a puar na chhan chu Iodine tlak chham vang a ni a. Pathian hian kan tui in turah a tawk chauh a lo dah a. Mahse khaw thenkhatah chuan Iodine a tlem lutuk vanga awrpuar nasa lutuk khuate tun hma chuan an awm thin a. Tunah Iodine chi (Iodised Salt) kan ei ta a, hei hian Mizoramah awrpuar a um bo zo ta ani. Kan naupan lai chuan awrpuar hi an tam em em a, a len lutuk chauhin mak kan ti thin.

Hemi awrpuar hi taksa tibuaitu ber ani lova. Amahah hian taksa pangngai taka awm tirtu ‘Hormone’ a awm a, chu chu tun laia kan buaipui ber chu a ni ta a ni. Thyroid hormone a tlem emaw a tam lutuk emaw chuan taksaah chi hrang hrangin a lo lang thin a, a changin lum ti reng mai te, thlan tla buan buan mai te, ruhna sup sup mai te, mit pawng hlet hluk te, lei tawt te, mi lum tih laia vawt lo ti reng mai te, tha khur der der te, hai hawt te, lungphu diklo te, chi hrang hrangin a lang thei a. Tunlai kan nun dan en hian Diabetis, BP sang leh Thyroid Function tha lo eng ber emaw nei kan tam tih a hriat a, kum 1-a vawikhat tal in check-up a, Thyroid function a tha em tih hriat ve a tha.

Hmeichhiaah phei chuan thi neih thlengin a ti buai a, hmai a bawl duh bawk a, a chang leh chauh ngawih ngawihte an nei thin. Tin fa an neih pawhin an thang thei lo a, an chen beh em em thei a, an tawi duh bawk. Nau chhiat te a awl bik a ni. Ruhseh nei ang maiin taksa leh ruhte a na then thum thei a, chuvangin vawi khat na na chu hetianga buai chuan Thyroid function lo test tir la, a enkawl a harsa lo.