Dikna inzirtir kan ngai

Mizote hi pipute hunlai atang tawhin hnam rinawm leh huaisen niah kan inchhal thin a, a dik pawh a dik reng thin. Amaherawhchu, rinawmna kawng bikah he thudik awmsa anga kan lo pawm thin hi a la dik reng em tih erawh chhut ngun ngai tak a lo ni ta.

India ramin hmasawnna hrang hrangah ke a pen mek zel a, a ram chhung cheng mi hnuaihnung leh harsa zawkte tan pawh hamthatna hrang hrang a siam chamchi ta mai. Chung zinga Mizoram-ah pawh kan lo hriat ve chu BPL leh NREGS te hi an ni. BPL hi mirethei tak tak, phai lamah chuan kawngsira riak mai mai ho khu an ni deuh ber. In leh lo an nei lova, luahman chawia in luah turin an rethei lutuk bawk. Bungrua sawi tur an nei lova, an hnathawh ber chu kut dawh leh mi bawlhhlawh paih zinga a hralh leh theih tur
chharkhawm a ni mai. NREGS pawh hi miharsate tana ni 100 inhlawhna tura Central Sorkarin a duan chhuah a ni a, sorkar hnathawkte inhlawh vena chi a ni lo.
Hetiang hi kan ramhruaitute’n an ngaihtuah dan a nih laiin hamthatna awm thei nia kan hriat avangin BPL Family nih ve hram dan leh NREGS hnuaia inhlawh hram hram dan zawng Mizote zingah kan awm ta fur mai. Hamthatna duh avanga kan nih loh pui ni anga lan kan hreh lo hi kan fate hian an hmu reng a, dik lo taka bul tan chhungkua-ah an seilian dawn tihna a ni. Hei hian kan fateah rilru dik lo a tuh a, siam danglamtu an awm a nih loh chuan an puitlinpui dawn a ni. School zirtirtu tam tak pawhin an naupangte dawt sawi hreh reng reng lo tam ta lutuk hi an buaipui mek a, a kaikuang ni bera an hriat chu inchhungkhur fuh lo niin an hria a ni. Hetiang zel hi kan thangtharte nun dan a nih dawn chuan Mizoram hmabak hi a thim hle a ni kan ti lo thei lo ang.