Ṭawngṭaina avanga chhanhim

 Kum 1912, April ni 15 Sunday zan chuan, pil thei lova an ngaih Titanic lawng chuan North Atlantic tuipuia vur tlang lian tak mai chu su-in mi sang chuang fe maiin vur tui vawt êm êm maiah chuan thihna an tawk mek a. Chu lawng lian tak maiah chuan Colonel Gracie-a pawh a chuang tel ve a. A nupui lah chu mel za tam tak danah America-a an in nuam tak maiah chuan alo awm a, mahse a muhil thei hauh lo mai a. Thil eng emaw takin a mawlh a, a pasal chu dinhmun hlauhawm takah a awm nia hriatna a nei a, tichuan a pasal chu Pathian venhimna a chan theihna turin a theih tawpin a ṭawngṭai ta a. Zankhuain a ṭawngṭai ta a, zing dar 5 alo thleng der mai a. Tichuan a thinlungah thlamuanna dawng nia a inhriat tak avangin a muhil ta a.

Chutihlai ve thung chuan Colonel Gracie-a chu nunau hmeichhia leh naupangte chhanchhuah an nih theihna turin lawng sipaite ṭanpuiin alo buai ve êm êm mai bawk a. Chhanchhuahna lawng chu passenger zawng zawng chhanchhuah nan chuan a tlem lutuk tih a hria a, ani chu a tel ve thei dawn lo tih pawh a inhrechiang êm êm a ni. Engpawhnise, lawng lian chu hnuai lam tui vawt tak mai pana a pil thlak dawn thleng chuan a chhuahsan chuang lova; tichuan lawng chawp chuan an pil thla ta vawn vawn mai a. 

Chutah, vawi khat na na na chu tui chungah chuan a rawn lang chhuak leh a, mak tak maiin chhanchhuahna lawng khaikhup lo lang chu a hmu ta tlat mai a. Midang rawn inhaichhuak ve dang nen chuan chu lawng te chu an vuan ta a, zing nichhuah ṭanpuitute lo thlen thlengin. 

Colonel Gracie-a nunna chu chhanhimin a awm ta. Chu zan, Colonel-a nupui ṭawngṭaina ngei chu Pathian chhanna ni-ah ngaiin Kristian rinawm tak dam chhuak ve te chuan Pathian-ah lawmna ropui tak an chhar hlawm ta bawk a ni.

Ṭawngṭaina hi kan himna ber  ani.

- Vanhmingliana (Taua)