Naupang bân dawk

 - Dr.Thangchungnunga, MS (Ortho)

Natna chi khat, ho ang reng taka lang si, naupang bân dawk hi an tam hle a. A tlangpuiin kum nga hnuai lam hi an ni duh ber. Ka experienced-ah chuan puitling pawh an awm ve ṭeuh mai. An bân a dawk ṭan chhan bul ber chu an duhlo chung emaw, an inringlo lai, an kuta vawna pawh thut hian a dawk duh hle. Heng bân dawk ho hi, a tlangpui chuan naupang chaklo emaw hrisel lo deuhah a awm duh bik. A châng chuan tlu pawh ni silo, an mahnia inring hman lova an in pawh ṭhut hian a dawk awl bawk ani.

Ban ruh hi pahnih ani a, pakhat  zawk hi a vir thei tura Pathian siam sa ani a. A vir theih avang hian kiu thlep chung pawhin, kut hi a tih zangthal-in, a tih khaikhup theih ta ani. Hemi tur hian, a pakhat zawk hi a vir ṭhin a. A vir theih nan, a chelhtu, duar-in a ṭawn bet tlat a, hemi a tawnna aṭang hian pawh-dawh palh ani tihna ani.

A dâwk veleh hian a na >m >m a, an bân hi an chet ngam lovin an kut lehlamin an vuan tlat ṭhin a, an ṭap
tlangpui ṭhin. He tiang a nih chuan a siam thiam doctor pan vat hi a ṭha ber a, siam har chuan siam dik a har bakah, a dam nghal mai lo duh ṭhin. A dawk hun tur hi hriat ani si lova, zanahte, chhunah te, eng hunah pawh a awm thei a, doctor pan ngaihna awmlo hunte pawh ani thei a, hei vang hian lo siam ve mai dan a awm a. A lehlamah chuan, doctor zawng zawng hian an thiam chuang lo a, nilenga X-ray te la a, kual pui hrep hnu a, tlai a ka hnena lokalte pawh an awm ṭhin.

A siam dan hi chu an bân kha a kiu-ah right angle-in dah la, a kiu-ah kut lehlamin chelh la, i kut ruak lam khan a kut kha hum la, a chhung zawngin han herh la, a ri bak anga, a dik ani mai. Hemi tur hi chuan a dawk zawh velehah tih nghal hian a awlsam ber.
He thil ka ziah nachhan hi chu, zankhuate, nilenga vah pui te, zut dam theiin an lo pawh chiam te, rei tak na tuar a, rei tak awm lo awm te an awm ṭhin a. Heng ho tân hian ka sawi anga tih mai khian, engmah tihchhiat tur a awm lova, a dik mai ang. A dik thei thlawt lo a nih chuan ruhlam thiam specialist pan vat tum ang che. A chhan chu, vawikhat a dawk tawh chuan a dâwk a dâwk tawh ?hin a, kum nga an pelh hma chu a dam thei tawh lo, lo zir ve ang che.