A ṭangkai zawngin

- Albert Lalngaihawma

Khawvel hmasawnna tilang chiangtu pakhat chu media leh information technology ṭhang chak tak hi a ni. Internet-in a connect loh ram pawh a awm tawh awm love. Kan ramah pawh hian chhungtin deuh thawah mobile phone/internet hmang kan awm tawh a. Kan inkawm khawm dan a lo danglam a, awm hmun aṭang second rei lo te chhungin mi a kawm ṭeuh theih a. Sawrkar leh pawl information-ah kan hmang bawk a. Chutih rualin kan ram environment leh economy thlir chungin, hmasawnpuinan nge kan hman tam ber ang hun leh sum khawhral zawngin?

A ṭangkaina lamah chuan mi mal mai nilo ram pum hmasawnna thlentu, ‘Economic development’ siamtu a ni. India ram sum thawhchhuah tehna (GDP) -ah pawh a thawhhlawk ber zing ami, income ti sangtu chu internet hman tamna corporate tax hi a ni. 

Amazon Founder, Jeff Bezos pawhin sum lakluh-ah Bill Gates a khum ta der mai. Hna a tichak a, mihring ṭha leh mihring mamawh a titlem a. Chutiang khawp chuan a ṭangkai a, sawrkar pawhin a
theih a piang chu digitalize-a internet hmanga thawh theih dan a dap zel bawk a, ‘Digital India programme’ pawh a kalpui mek a ni.

A ṭhatna sawitur a tam tluk zet hian keimahni leh kan environment a tihchhiat vek theih dan sawi tur hi a tam hle bawk a. Ṭhalai khawvela harsatna lar em em mai chu, internet kaltlanga mi nun tih buai emaw, mahniin tihchhiatna Cyberbullying/Cyberharassment hi a ni a. Khawvelin a buaipui mek a, internet-a an thil tawn avanga depression nei leh mahni intihlum (suicide) pawh hi an tam tawh hle a ni. Mimalnun a tihchhiat bakah ram hmasawnna tur a thawhhlawk ber tur ṭhalaite hun leh nun a la hek a. Ram hrang hrangin an vei a, Cybercrime-te, Cybersecurity-te pawh zirlaiah an tel a, zirna in lian tak tak an din bawk a.

A ṭhatlohna kan hriat avanga inthiar fihlimsan erawhin venna ṭha ber a ni lo maithei. Ṭum khat chu “Internet hian min ti buai em mai” tiin social network te ka han khawih lova. Chu chuan khawtlang leh kohhran bakah nitina thawhpuite tan information-ah harsatna ka siam telve ta reng mai a. Chutiang khawvel hmasawnnain min demand na a cheng kan nih tawh avang chuan kan phaktawk leh kan khawih thiam chinah hian kan ṭangkaipui tur zawnga hman dan kan zir hi a pawimawh hle a ni. Mi ṭhenkhat chuan internet kan khawih hian manner kan hlohvek a, mi rilru kan hliam a, thilmawi a nih leh nihloh kan ngaihtuah hman lo ṭhin. Kan hnam tlemte chungah hian ‘Youtube’ khawvel hrang hrang a mi ten an tih ang tih ve kan tum zel bawk a, chu chuan kan environment a mil em tih lam kan ngaihtuah tel ṭhin lo.

‘Developed Country’ ram dang ṭanpui thei tawh khawpa mahni intodelh kan tih ram 35-te hi an mahni tawkah an induh ve ṭhin hle a. Developram nitur hian ṭhanna (growth) bik an nei a, an hriatloh lam kawngah chuan an hre lo ve ṭhin hle. An entertainer/celebrity-te kan ngaihsana kan hriat chian ang hian an inhrepawh ve lem lo niin a lang. South Korea-te khi developed country anni tawh a, India thawhchhuah let engemawzat hi an thawkchhua kmek a ni. TV leh internet-a kan en fo ṭhin vun no nalh tak takteah hian saptawng(English)a biak theihloh, he laia kan nuihzatte ai pawha zahpuiawm tur hi an awm ṭeuh a ni. Chutiang anni chung pawh chuan kan ngaisang tlat si a ni. Footballer lar,kan unaute ang maia kan hriat chian Ronaldo leh Messi hre map lo America khawmualah khuan mi pangngai ve tak engemawzah an awm bawk a. An hawizautawk loh vang pawh a ni thei ang. Amaherawhchu Knowledge hi power kan tih rualin kan environment atan a applicable loh chuan development a siam chuang lo a ni. Ram ṭhanglai ‘Developing country’ a awm kan nih angin ram changkang zawk chu kan thlir leh entawn an ni lo thei lo ang a. Amaherawhchu entawn an nih chhan hriattel hi tum ila. Internet a ṭangkai zawngin i hmang ang u.