Ṭhalaite hnena kum thar thuchah

- Vanhmingliana (Taua)

Hnam anga thil vei hi ka nei ve a, a chhan chu kan naupan lai atangin a tak tlem a zawng ka lo hmu ve hman a; chu chu titawp mai lova, chhunzawm leh vawn nun zel ka duh vang a ni. 

Hawihawmna hi tunlai thalai te leh naupang te tlakchham tak langsar tak mai leh pawimawh em em mai si chu a ni. A kaihhnawih langsar te chu, midang te pawisakna, aia upa te zahna te pawh kan ti thei ang chu. Kan naupan atanga nupui/pasal kan neih ve tawh thleng khan aia upa zahna hian hmun a chang lian em em a, ei leh bar zuk leh hmnuam, zu hmun thlengin ziaka dah ni lo roreltu pawimawh ber a ni thin, Val upa thuchhuak hi sawrkar thuchhuak ai pawhin kan dah pawimawh fe zawk thin.

Tunlai khawvelah hian pui pun nikhuaah thingpui ruai, chaw ruai thehna awm se la, a ei hmasa leh a dawh   
hmasa ber nih tumna a lian ber tawh. “Tar leh upa, naupang ten ei hmasa rawh se, kei chu ka ril a tam lo” tih thin tawngkam te kha vana rah ang a ni ta mai, keimahni erawh chu mizo kan la inti reng tho si a. Thalaite a thar hmasa chuhhelh bera an tang ta thin hi chu sum nise a va duhawm dawn em. Mizo ze dik a ni miah lo, hnamdang pawhin an ching lem lo. Vai chhia kan tih ho chin tawk lek a ni.

Aia upa zahna hi khawvel mihringte zinga ze mawi ber a ni hial awm e. Mizote zingah lek phei chuan hmanlai atanga mizote dan tha leh chelek ber leh hmanraw ropui a ni hial ang. Chhiatni thatni thawhchhuahna chi hrang hrangte hi Valupate thua relfel vek mai thin a ni. Zu in rual lo, mei zu rual lo te’n an ti lui an hmuh chuan “naupang te te” tiin mi fate pawh ni sawmsarih rawh se an khapin an hau mai thin a, a zawng zawng ni lo mahse, naupangten ‘inzahna’ avangin a theih chin chin an zawm mai thin. Tlangval intihbuaiin insual sela Valupa ten an thelh tawh chuan tuman an chhunzawm ngai tawh lo,  an bang hmiah zel mai. Tunlai thalai te ve thung chuan aia upate zilh-hauhna leh thelh tumnate hi engah mah an ngai tawh lo, “ I lo sawi tur  a awm lo, i chawm i hrai pawh ka ni lo” an lo ti erh mai zel, a thente phei chuan a thelh tumtute an lo bei let hial thin.

Zo nun mawi, tlawmngaihna, aia upa zahna kan mizo hnam rohlute hi i ti thamral mai lo teh ang u. Hmanlai Mizote kha Zawlbuk ah te in hrilh thin , khawtlang dan bawhchhiate inhrem thin kan ni a. Khatiang hun kha a awm thei tawh lo a nih pawhin, Y.M.A kalkhawmnaah te, Kohhranah te sawichhuah ve fo ni se, sawi sawi na na hi chu thinlunga cham tawk a awm ve mai a nia. Tunlai thangtharte an chapo ta em a ni tihna ni chuang lovin, pi pute dan rangkachak kha hrihlhhriat an nih loh chuan an lo hre miah lo thei a, tin, tul lovah te pawh a ngaih theih a. Chuvang chuan hrilh hriat an ngai tak meuh meuh a ni.

Kan ram leh hnam humhalh nan hian zo nun mawi hi thi mai lova vawnnun tlat hi kawn tinrenga kan hruaitute hian i hre reng ang u, hrilh hriat hi kan bat ni nghe nghe se.!