Ngaihdamna

- Vanhmingliana (Taua)

Mihring te thinlung hi engngatinge a hlim sârh theih loh? Kan thinlung chhungril a min ti hrehawm tu ber hi engnge ni ang? A pawimawh êm avangin ngun taka ngaihtuah a, a damna tur ngaihtuah chhuah ngei hi a va pawimawh em!

Mihring thinlung hi sum leh pai \hahnem tawk tak a dawn laiin em ni a hlim ber \hin? Ni lo ve, a sual te ngaihdam
a ni tih a hriat chhuah veleh a chhungril hlimna tak tak a nei chauh \hin.

Josepha unaute hlim hun lai ber chu a chunga thilsual rapthlak tak mai an tih te a ngaidam vek a ni tih an hriat kha a ni. Chu mai chu duh tawk lovin an pa damlaia Josepha hnena Jakoba thusawi, “ Khawngaih takin I unaute bawhchhiatna leh an sualna chu ngaidam ang che”

Ngaihdamna pek leh ngaihdam dilna hi thil awlsam lo ber mai, mahni leh mahni indona khirh ber a ni. Pathian duhzawnga mahni inpêk leh inhlanna a\ang chauh lo chuan thil theih pawh a ni lo. Ngaihdam dil ai chuan an sualna sawi chhuah ve zel hi thil awlsam zawk a ni a, mi tam ber te ril taka inhuatna, damchhunga thlah te thlenga ral thei lo \hin chu a ni. Pathian erawh chuan kan sualna zawng zawng min ngaihdam sak  a, sual thihsan a nunna kan chan theihna turin A Fapa kraws ah a hlan ta zawk anih kha!

Vawikhat chu New York khawpui kawtthlerah Kristian nu fel tak mai hi ngawi rengin a kal a, basket in apple a khai a; a bulah chuan lawng hnathawk hi a kal ve a. Dim bak sak lovin chu pa chuan apple khai nu chu a nam kat dawrh a, a apple khai chu kawng laiah  a lum darh ta vek a. Nimahsela,  chu Kristian nu chuan phunnawi lovin ngawi rengin a chhar khawm a.

Chu lawngpû tawrawt tak hnenah chuan, “Keiman ka ngaidam che ang bawkin Pathianin a ngaidam che, ka fapa” a ti a. Chu thu kam khat tê mai chuan chu pa thinlungah chuan hna a thawk a, a thinlung chu a hneh ta hle mai a. Amah leh amah chu a inhnial a, “Nuam ka tih zawng a ni ve mai alawm” tih a tum \hin laiin aw te tak te chuan, “Min ngaidam rawh ti rawh” tiina lo tur ve sek bawk si a. A hmai a sen awp awp a, a tawpah chuan ngaihdam dilna chu a nei thei ta a. “Min ngaidam rawh, Pathianin malsawm che rawh se, mi ngilnei leh zaidam” tiin, a kuath chuan pawisa a pe nghe nghe a. A tu chu nge hlim zawk ta ang le?

A dik a dik chuan ngaihdam dil hi harsa tak a ni. Mi, an thil tih sual tak laka ngaihdam mai pawh hi thil harsa tak a ni. A chhan chu mihringa chapona awm hi kan hneh theih loh vang a ni ber. Setana hian a harsa thei ang ber turin min lo chotuah \hin bawk si a. Mahse, Pathian chuan hlimna kawng min kawhhmuh dan a ni miau si a. 

Kan Pathian chuan kan sual zawng zawng ngaihdam nana a insen so zia Kraws ah a lo ti lang a; miin ka pawi chhete an sawi ka ngaihdam avanga ka senso ve hi engzat nge maw ni le? Kan chhûtin kan bûk tawn ngai em le? “Kan chunga thil tisual kan ngaidam angin kan sual te pawh ngaidam ang che” tiin kan \awng\ainaah kan delhkilh thlap lehnghal bawk si a.

Inngaidam tawnin intihlim zel the ang u khai!