Pi Lalliani kan chan ta
16 June, 2010
5
comments
Pi Lalliani (87) w/o Upa Lalhmingthanga (L) (P&Sons) chu vawiin (16 June) chawhnu dar 2:15 khan Chuap natna avangin Shillong-ah a boral a. Naktuk (17 June) hian a fanu Pi Lalparliani awmna hmun Shillong-ah vui a ni ang.Pi Lalliani Aizawl lama 'Ral Vui' hunserh chu a fapa Pu Thanglianchhunga, Zarkawt inah 17 June, 2:00 pm hian neih a ni ve ang.
A chanchin : Pi Lalliani hi Pu Tahnglula(L) leh Pi Chalthangi(L) te fanu niin 5th December, 1923 khan Thakthing Vengah a lo piang a, unau 9 zinga a milai a ni. Kum 1941 khan Lalhmingthanga s/o Pachhunga (P&Sons) Dawrpui nen inneiin fapa 3 leh fanu 4 an nei a ni.
Pi Lalliani hi Pu Lalhleia thusawi-ah thlarau lama piantharna changin khawngaihnaa chhandam kan nihna buaipuia auchhuahpui hmasa ber zinga mi a ni a. Aizawl leh a pawn lam thleng pawhin Krista thiltih vanga khawngaihna kan chan thu hi a tlangaupui thin a. He Pathian thu hian a nun a hneh hle a, a pasal leh a fapa a sun tum pawhin Kristian dik tak tawrh dan tur ni awm takin a tuar thiam em em a ni. A theihtawpin Kohhranah inhmangin Kohhran leh Bial-ah te pawh Kohhran Hmeichhe Chairman nihna a lo chelh ve tawh thin a ni.
Nu invawng tak niin, nu inchei fel leh fai, hmuh nuam lo leh bawrchhawr taka awm ngai lo a ni a. Nu kawm nuam leh midang, a bik takin dinhmun harsa zawka dingte hriatthiamna nei mi a ni. Nu rilru nghet, nu fing, rawn tlak, chhungkaw khalh ngiltu leh tu leh fa kilkawi thiam tak a ni a. Thil sawi fiah thiam tak, lainatna ngah tak, chhiatni thatnia inhmang tam, mahni tu leh fate mai nilo, midang tan pawha nu nih tling tak a ni.
A nat tan dan : Pi Lalliani hi nu pian tha, ei leh in lama insumthei tak niin, nu hrisel tak a ni a. A kum lo upat deuh hnuah hian taksa te chaklo deuhin a hriselna pawh a lo tla hniam ve ta deuh a. May 2009 khan Delhi-ah check up in a kal a, chuap chaklohna a nei tih hmuhchhuah a ni a. July atang khan a natna hian zual lam a pan deuh avangin in lamah enkawl a ni a. December thlaah Kolkata-ah a kal leh a, an lo haw lam chu ama duhthlanna ngeiin a makpa Prabat-a te inah a awm zui ta a ni. Hetah hian a natna enkawlna atana inmil tur leh remchang turin pindante pawh buatsaih sak a ni. A han tha lailawk leh thin deuh na in a tha chhuak thei tak tak lo va. Tun hnaiah khan zual lam a pan hret hret zel a, ni 16 June, 2010 chawhnu dar 2:30 khan chatuan rama chawl turin min lo kalsan ta a ni.
A nat chhung hian a titi tui ber chu Pathian thu a ni a. Thlamuang tak leh hlim takin a hun hnuhnung lam hi a hmang a. A chhe ber a thleng a nih pawhin a ruang la buai lova Shillong a phum mai a duh thu a sawi lang a. A u Lalhmingliana (L) an lo phum tawhna European thlanmual an tih mai, All Saints’ Cathedral Old Cemetary, Garrison Ground-a inphum an dil lawk chu remtihsak an nih avangin heta phum tur hian ruahmanna siam a ni ta a ni. He ruahmanna hi a damlaiin a hre hman vek a, mi dang phum an phal tawh lohna hmuna inphum an lo remti hi amah pawh a lawm viau nghe nghe a, rilru hahdam leh thlamuang takin a chawl thei ta a ni.
Kum,in hian Mitthi in nei nual ta mai... A zialo thrin hle mai. Aizawl mihlun an boral hi an uihawm duh hle mai. Khawhar chhungte Pathianin thlamuan rawn se.
Nia, ka hriat sual loh chuan kumin hian mi 18 vel kan in vui leh ta der mai chu ania! Pi Lalliani a bik takin a uihawm khop mai, Aizawl mi hausa hmasa leh Dawrpui mi hlun, a nulat lai leh tun thleng poha hmelthat lara la lar ve kha ania.
Dawrpuia vui a nilo hi lehlamah chuan a uihawm ka ti tak zet. Mhse helamah an chhungkua an tlem toh bakah ina awm a lawi an awm loh avang ni deuh berin ka hria Shillong-a a fanu awmna lama vui anih.
Shillong ah vui anih nachhan chu ama duh thlan ngei ani.
Shillong-a vui a duh na chhan kha??
Pi Lalliani, a uihawm hle mai, YMA leh khawtlang thil a len luh changa alo inhawn thin zia leh a inpekna te kha ka hre reng thin. A kalsan tak chhungkhat laina zawng zawng ka tawrhpui tak zet.