Intensive Care Unit (ICU)

Intensive Care Unit (ICU) hi Aizawl Civil Hospital-ah kan lo nei ve ta a, damlo thih mai hmabaka lang chhanchhuah pawh an tam ta hle. A mah hi mi nazawng luh theih loh anih avangin a awmzia pawh hre vak lo kan tam hle.
Thil mak ve tak chu, kan naupan lai chuan Betnesol an pe tawh an tih chuan a thi tep tawh tih sawina ang deuh a ngaih a ni. Kum 1980 hnu lamah erawh chuan Oxygen an pe tawh an tih chuan thi mai thei tihna-ah kan ngai hmiah. Kum 2006 atanga ICU kan neih hnu hi chuan, ICU-ah an dah an tih chuan a thi tep tihna ang alo ni leh ta a, kan changkang ve sawt viau e.
ICU hi Intensive Care chhum lo chat lova Doctor leh Nurse-te awmchilha enkawlna hmun, mi thi tepte chhan theih beiseia dah luhna a ni ber reng a ni. A chhungah hian khawl chi hrang hrang damlo lu bul,
bangah leh a sir velah a awm teuh a, khawlah chuan a thawk ran leh muan te, a blood pressure-te, a taksa-a oxygen tam leh tam lohte, a lungphu-te a lang nghal vek a. An thaw theilo anih pawhin hrawkah pipe an vuah a, khawlin a thawk tir mai a ni. A lung a phu tawp a nih pawhin lung tiphutu a awm a, khawlin lung chu a tiphu leh mai a ni. Tuna kan neih aia tha phai ramah phei chuan darthlalang bawm a awm a, a chhungah chuan taksa lum dan tur tawkin an tilum a, a thih theih loh a ni ber mai. Specialist ka zir lai khan kan zirtirtu pakhat fapa, a sikul kal haw engmah hre lovin a awm thut mai a. Chutiang bawmah chuan an dah a, mahse a thluak a lo chhe hman tawh a, khawl ringawt chu a nunna a ni ta a ni. Ni 4 hnu chuan tih tawp mai tur an ti a, titawptu tur an inhmu zo lo a ni ber. Khawl off tu tu kha a thih tirtu ang deuhin a lang tlat. A tawpah ni 7 na-ah Orthopadic-a kan Lecturer-in a off ta a, a thi chu a ni mai. A hma pawh khan a thi tho a, khawl hmangin a thaw a, a lung pawh a phu a, a zun pawh a inmil tawkin drip an pe a, a kal ve zel bawk. Hetiang deuh hian ICU-ah chuan boruak leh a chhung thianghlim a ngai a, mi nazawng an luh tir lo reng a ni.
I thawk a apiang khan natna hrik 80 aia tlem lo i thaw chhuak a, chutiang vel tho chu i hip lut bawk tih hria ang che. Mitthi In-a kan han thu khat hmur mai te hi chu natna hrik chi hrang hrang TB telin boruakah a za tel a leng nuai nuai reng a ni. Mahse Pathianin kan taksa hi natna hrik laka dotu (Immune) a nei tam em em a, na lovin kan haw leh mai zawk a ni. Hemi natna dotu hi AIDS veiah chuan a chhe vek a, chuvangin natna hrik an kai hlekin an thihpui nghal mai thin. AIDS thihna tam ber chu TB, Pneumonia leh kawthalo an ni ber reng a ni.
Chuvangin i taksa hi mak taka siam a ni Bible-in a tih hi a dik reng a ni. Tun Computer Age-ah pawh hian “A then pawh kan hre thei lo” tih hla ang deuhin kan la hriat loh tam zia hi kan la hre lo, chu chuan a siamtu ropuizia a lantir a ni.