2010 YMA Dawrpui Branch Secretary Report

Kum 2010 kum tawp kan lo thleng leh dawn ta reng mai a, Pathian kaihhruaina a zarah kumin chhung hian Branch YMA chu tluang takin a kal thei a, a lawmawm hle mai. Kan Branch hi kumin chhung hian Section 3-ah inthenin member hi Chawngbawla Section-ah 643; Taitesena Section-ah 511; Vanapa Section-ah 511 awmin Branch pumpuiah - Mipa 863 leh Hmeichhia 802 kan vaiin 1665 kan awm a ni.
Kum dang ang bawkin Branch chhunga hmalakna hrang hrang atan mawhphurhna chi hrang hrang 15 siam a ni a. Mawhphurhna changtu thenkhatin thahnemngai leh taima taka an thawh laiin thenkhat erawhin kan ngaipawimawh lo deuh!
Kumin chhung hian CYMA ngenna angin Chapchar Kut-ah Tlanglam leh Chai kan entir thei a, Sorkar leh CYMA hmalakna hrang hrang - Land Record Survey, BPL Baseline Survey kan nei a, Disaster Management Training, State Level Workshop On Blood Donors Recruitment-ah Branch aiawh member kan intir ve. Vety
Deptt. hnuaia sa thianghlim chungchanga “Awareness Campaign On Meat Hygiene” chu kan Branch-in kan buapui bawk.

Thlanmual thar Dawrpui ta bil neih tula hriatna avangin ram lei a ni a, a pass engkim pawh tlawmngaia hmalatute avangin tih fel a ni tawh a; he thlanmual tharah hian tum hnih (2) hnatlang koh a ni tawh nghe nghe. Kan YMA building (dawr) thenkhat, Pu Lalsawta Bialtu MLA Fund Rs. 50,000/- (Nuai hnih leh singnga) min pek hmangin sak that a ni a, Thlanmual-a Shed sak nan Rs. 1,50,000/- (Nuai khat leh singnga) min pek hmangin hmalak mek a ni bawk. Hemi hmang hian tlawmngaia thlanlai thinte pawhin tawmhulna an nei thei tawh ang. Tin, tunhmaa Pu Vanlalzawma MP in a Fund atanga Rs. 2,00,000/- (Nuai hnih) min pek (Dawrpui School Hall Stage siamna tur) chu Dawrpui School Managing Board-ah thehluh a ni a, tun aia Stage tha zawk leh zau zawk neih thuai ilo beisei ang u. Kumina Mamit leh Ngopa leikhi tuarte tanpui nan ` 50,000/- (Singnga) chuang lai kan hmu bawk.

Central YMA buatsaih Football leh Basketball-ah kan tel ve thei a, Guinness World Record-a Cheraw kan-ah kan tel thei a, bu 7 lai thawh ve in, member 140 lai kan tel thei. YMA Platinum Jubilee lawmna chi khat Branch Sports kan buatsaih thei a, Branch Raising Day lawmna atan Beat & Solo Contest buatsaih a ni a, Branch member talent nei tha tak tak an inphochhuahna remchang a ni a, a hlawkthlak hle.

YMA Gen. Conference vawi 65-na Lunglei-a neih ah member 77 kan kal thei a, Special Item “Musical Dance With Live Band” kan entir chuan Palaite lawm a hlawh hle. Lunglei lamah chuan Demand Channel-ah an thlang tlut tlut niawm tak a ni. Lalruata leh a thiante chawiena hai pawl an awm tih mai lo chu kan che chhe lem love. Conference tawp zanah hian Lunglei lama an hmun nuam, Kawmzawl-ah musical instruments kim nen kan inchawi phei a, hlim takin thla eng hnuaiah kan zai ho chu a lo nuam ngei mai. Conference kal hi a hautak a, sum sen pawh a tam thin. Kan thalaite hlimna leh inkawmngeihna a nih dawn a, thalaite kan inlungrual phahna a nih phawt chuan sum sen kawngah tam lua awmin Dawrpui Branch YMA chuan a ngai lo. Thawh hun a awm a, hlim hun pawh a awm ngai e! Kum tharah pawh hruaitu thar duhawm tak tak kaihhruaina hnuaiah Kolasib lamtluang zawhin kumin aia tam liam thla ngei turin YMA member-te kan inngen lawk a ni.

A tawp berah chuan Dawrpui nula leh tlangvalte chungah lawmthu ka sawi duh. Kan hriat angin kumin chhung hian mitthi kan nei zing em em a, a tam zawk lumen ngai an ni lehnghal. Mitthi 26 kan nei a, Ruang thawnchhuah 10 kan nei. Tanpui ngaite tanpuitu YMA member in nih ang ngeia mahni pawimawh kalsana thlan in laih thin avangte, tlaivar thak a lusun chhungte hnem tura in zai mawi tak hriat tur a la awm reng mai hian Dawrpui khawtlang a ti thlamuang thin. He zonun zemawi hi vawng nunga zel tura ngen chungin ka report pek hi kan ti tawp ang e.