Home »

Kan taksa spare part

12 February, 2011 1 comments

Pathianin mihringte a siam hian a lo rem fel em em mai a. Science thiamna atang pawhin kan hre ve teuh tawh a. Mahse kan taksa ropui leh mak zia hi kum 100 pawh ral leh mahse a zatve pawh kan la hre chuang lovang.
    Abrahama hnena ni 8-naah serh tan tur atih te kha Science lam atang chuan a lo dik thlap mai a. Naupang apiang an dam chak a. Kan intihpalh emawa thisen chhuak hi amahin minute nga velah chuan a phui ve mai a. Hemi thisen chhuak ti tawp tur hian factor thil chi hrang hrang sawm zet kan hre tawh a, mahse engzat nge kan la hriat loh hi hriat a ni lo. Ni 8 a serh a tan tir kherna chhan kha, heng thisen chhuak titawptu thil chi hrang hrang hi ni 7-naah an insiam peih vek a. Zan dar 12:00 a ni 8-na atangin an thawh tur ang chiahin an thawk  tan chiah ta thin a. Ni 7-ah lo tan tir sela chu thisen khang thei lo in an thi mai tur.
    Chutih laiin kan taksaah hian Spare part kan nei ve kan ti dawn nge, reserve kan nei nual a. Pakhat chu, Kal (Kidney) hi ani a. Kan nun hrisel pangngai lai hian hmun thuma thena hmun khat chauhin hna an thawk
a. A dang zawng chu Emergency atan a dah an ni a. Kal pakhat chauh pawh kha hmun thuma thena hmun khat chauh a hmang a, taksa tan a tawk em em ani.
    Kan ke chawn hrulah hian thahrui (Tendon) feet khat dawn laia sei a awm bawk a, lakchhuah pawhin engmah thawk ve lo anih avangin a pawi lo a. Mi accident-te vanga thahrui a lo chah, zawm phak loh a lo nih chuan kan la chhuak a, zawm nan kan hmang thin.
    A dang leh chu, kan ke ruh te zawk hi emergency-ah chuan a lak chhuah theih a. Ban ruhte, malpui ruh te tawi lutuk zawm sei nante kan hmang thin a. Hemi ruh tello pawh hian ke a buai chuang lo. Tin, kan thin (Liver) te pawh hi hmun thum a then a hmun khat chauh in pangngai takin an thawk a. A dang chu Poison (Tur), zu, drugs leh thil tha lo lo awm hun a hman turin a reserve a, natna nasa tak kan neih pawh a kan dam reng theihna pakhat a ni.Chuvangin kan thin hi duat a, a huat zawng dah luh loh a tha ber.
    Zan kan muthilhte hian taksa zawng zawng a chawl vek a, engvangin nge kan thaw leh lungphu hi a chawlh ve loh, a chhan chhui chhuah theih a la ni lo. Kum za pawh mi dam sela chawl lova thawk theitu thluak ami hi engti fakauva siam nge a nih kan chhui chhuah vek theih chuan kan Pathian min siam ropui zia hi a nepin Pathian ni tlak pawh a ni lovang. Chuvangin khawvel awm chhung hian kan taksa ropui, mak leh rapthlak zia hi kan chhui chhuak dawn chuang lo. Kan Bible-ah lah eitur leh ei loh turte, kut silfai a pawimawh zia te a in ziak vek a, mi hrisel tha nih i duh chuan Mosia hnena Pathianin a hrilhte hi lo chhiar thin ang che.
- Dr Thangchungnunga, MS (Ortho)

1 comments »

  • Chicco said:  

    Post hlu tak anih hi, bengvar thlak lutuk.
    Achang chuan, vai mistiri kawng hi ka kawng spare atan hian ka va duh thin em.

  • Leave your response!

    Han sawi ve teh le.