Lura kan chan ta

Zosanglura Hmar hi February 16,1976 khan Zohmun khuaah Pu JC. Lungmuana leh Pi Lalnunthari te fa 6-zinga upa ber dawttu niin alo piang a. Zohmun atanga Aizawl a lo chuan thlak hian Pu J. Thanzuala (L) te hnenah hun engemaw chen a khawsa a, an hnena a chen chhung hian a tul tulte thawhsakin an Motor te pawh a khalh sak thin. Heta a awm lai hian Rochhumi (Chhumpuii) nen February 10,1998 khan Dawrpui Presbyterian Kohhran-ah Rev. Challianngura kutah an innei a ni. Lura hi Dawrpui venga a awm chhung hian Khawtlang tan pawha mi tangkai tak a ni thin. Kum 1996 atanga tan chhoh Dawrpui Khawtlang Duty-ah a kul a taia inhmangin, a theih tawpin khawtlang tan a hun a hmang thin. Dawrpui veng titawptu ruihhlo zuarte leh a ti thinte hi a ngaimawh em em a, he ruihhlo thenfaina kawngah hian a sulsutu ber te zinga mi a ni.

Kumin July thla atang khan a taksa-ah insawiselna nei tanin August 4, 2011 khan Aizawl Civil Hospital-ah Admit
a ni a, Doctor ten Investigation chikim an neih hnuin, a taksa bung hrang hrangah natnain bu a lo khuar hle tawh tih hmuhchhuah a ni. Heti chung hian a na hi a sawi duh ngai hauh lova, pa tuarchhel tak a ni a, a thihni thleng pawh hian na tuar hmel a pu ngai hauh lo. Doctor te leh Nurse ten a thatchhuah leh ngei theih nan theihtawp takmeuh an chhuah a. Amaherawhchu, Lalpa’n a hnena chawl tawh tura a kohna chu August 27, 2011 (Inrinni) zing dar 5:00 khan a lo chhang ta a ni.