Home »

Pu Zotea kan chan ta

28 January, 2012 1 comments

Pu R. Zothansanga (K 59) hi Pu R. Vanlawma leh Pi Lalchhungi te karah a lo piang a, an unau hi pasarih niin, an unau zingah a pathumna a ni. Kum 1980 khan Lallunghnemi Hmar nen inneiin fanu pakhat leh fapa pahnih an nei a, tu pathum a nei bawk.
Amah hi pa tawng tam tih tur ni lo mahse fiamthu duh tak a ni a, fiam dawl tak niin pa hlim thei tak a ni. A nupui fanaute leh a tu leh fate a ngaihtuah em em a, a tute sikul kal pawh a hruai zat zat thin.
Pa zaidam, thenrual huikhawm thiam tak, thu leh hla thiam tak a ni. Kum 1986 atangin ‘Huapzo’ Chanchinbu
enkawlin Editor a ni thin a, sap tawng a thiam nal hle bawk. Chanchinbu a chawlhsan hnu-ah Politics lamah inhmangin Dawrpui VC Member leh Secretary-te pawh a lo ni tawh thin. Hun rei tak chhung Congress Party Unit President lo ni tawh in, rinawm taka hruaitu lo ni ngar ngar thin a ni. Tunah hian Vice President nihna a chelh mek bawk.
Rawngbawlna lamah pawh a phak ang tawk tawkin a inhmang ve thin a, kum 1981 - 1993 chhung khan Sande Sikul Department hrang hrangah Zirtirtu a ni a. Kum 1994 - 1995-ah Puitling Sande Sikul Secretary a ni bawk.
A mah hi pa hrisel tha tak thin a ni a, nat lawkna em em a nei hran lova Jan 19, 2012 (Ningani) tlaiah khan a thil ei a hak sual hlauh mai a, a thaw a buai a. Damdawi In panpui nghal niin Doctor leh Nurse ten theihtawp an chhuah chungin an chhan zo ta lova, hemi ni tlai dar 6:30 khan chatuan ram min lo pan san ta a ni.

1 comments »

  • Asteric said:  

    A boral dan chu damloh hriatlawk a ni si lova a chhungte hrilh a hai duh awm hle mai. Thihna hi engtiklai pawha kan chunga thleng thei reng a ni tih min hriatnawn tir leh e.

    Pathianin a rawngbawltu hi a hnen ah hruai ngei sela, a chhungte thlamuanin awmpui se tiin ka thlah liam ve e

  • Leave your response!

    Han sawi ve teh le.