Home »

Damdawi ei dan

25 March, 2012 0 comments

Mizote hi common sense kan nei tha hle a, kan nei lutuk hian mahni ngaihdana thil tih mai kan ching a. A bikin, In sak te, damdawi lam te, zirna nei miah lova mahni ngaihdan thu dik ber anga sawi leh ti hmiah hmiah mai thin kan ni. A thatna tam tak awm mahse a that lohna, thiam thil zir ngai deuh bikah hi chuan mithiamte thu hi ngaihchan thiam a tha hle.
A bikin, damdawi ei chungchangah hian a ni. Khua a sik emaw, pum nuam lo emaw, lu na emaw hlekah mahni hriat hriat, Ampicillin, Tetracycline, Dependal M, Paracetamol te kan ei nghal zel a. Vawihnih khat kan ei a, a lo nuam deuh a, kan ei zawm leh lem hlei lova. Hetiang deuh hian Malaria nia kan rin chuan Chloroquin emaw Quinine mum vawi hnih khat kan ei tir a, khawsik a reh deuh a, kan tawp leh mai thin a, helai tak hi a pawi lai chu a ni. Eng natna pawh chu lo ni se, kan damdawi (Allopathic) mum ho hi chemical (Damdawi hrang hrang remkhawm) a siam vek a ni a, side effect a nei vek
tih hi hria ila. Malaria damdawi Chloroquin te ni hnih khat kan ei zeuh a, kan tawp mai a, Antibiotic-te pawh vawi hnih khat kan ei a, a lo nawm deuh chuan kan tawp leh mai avang hian Aizawl velah phei chuan Malaria resistant (Engmah haw tawh lote) kan ngah ta mai. Hei hi a course ei kim loh vang a ni ber. Ampicillin-te phei chu hman chi pawh a ni tawh lo, a tello chuan natna hrik hi an dam theilo zawk tawh hial ang. Chuvangin antibiotic-te kan ei a, kan ngeih anih chuan a course full, a tlem berah ni nga tal hi ei tum hram hram tur a ni. TB damdawi te thlengin, a course kan ei zo lova, chu chuan ei leh pawhin sawtna a nei tawh lo ta thin a ni.
Nachhawkna zawng zawng hi pum tina thei vek an ni tih hriat tur. I ei a nih chuan pumpui venna, Ulgel te, Digene, etc ei tel thin tur. Hetiang pum damdawi tui phei hi chu a chhin hnih lek leka ei chi an ni ve lova, vanvadaka ka khat pawrh a buna lem tur, chu chu a ei dan dik ber chu a ni mai.
Hritlang damdawi te pawh lung lam khawih buai chi a tam em em a, hengah te hian fimkhur ve deuh a tha. Tuna a nachhawkna kan han ei mai te hi chu a reh chuan a tha mai a, mahse tui tam deuh nena ei hram hram tur. Tul lovah pumpui na kan insiam chawp a. Ruhseh nei ho phei chu nachhawkna an ei tlut tlut a, hei hian pumpui a tina-in nghawng thalo a siam thin a ni.
- Dr Thangchungnunga, MS (Ortho)

0 comments »

Leave your response!

Han sawi ve teh le.