Pi Hmuaki kan chan ta

Pi Zahmuaki hi kum 1950-ah Khuanghlum khuaah a piang a. A pa Khawsela (L), a nu Lalzemi a ni. Pangzawlah sawikhawmin an pem a. Unau 8 niin a upa lama chhiara 4-na a ni. A unau 3 te an boral tawh a ni.
Aizawl-ah kum 1970-a rawn khawsa tan a. Kum 1987-ah Pi Rozingi inhnuai ber luahin kum 1 chhung a khawsa a. Chumi hnuah Pi Thannguri, Zarkawt in luahin a khawsa leh a. Tichuan kum 1989 kum tawp atangin Pi Rozingi hnenah rawn insuan lutin vawiin thleng hian mahni in anga neiin a khawsa ta a ni.
A NAT DAN : Pi Zahmuaki hi nu hrisel leh chak tak niin insawiselna pawh a nei ngai lo a. Kum 2011, August atang khan a insawisel tan a, a bazar kalte hi a chau thei hle a. Ni 28 September, 2011 khan Doctor hnenah entir a ni a, investigation chi hrang hrang tih a nih hnuin chuap cancer a ni tih hmuh chhuah a ni ta a. Cancer a ni tih a inhriat hian a pawm thiam hle a, a chi-ai lo a ni. October thla-ah Nazareth Hospital-ah Chemotherapy vawi 3 a la a, a taksa a chauin a tuar hle a, lak chhunzawm a duh ta lo a. Tichuan
CARE Hospital-ah kar khat dah luh leh a ni a, chumi hnuah in lamah enkawl chhunzawm a ni ta a. Amah pawh a tha chho viau a, mahse, kum a lo thar a, a lo chak lo chho zel a, a tho chhuak peih ta meuh lo a ni. Mut hmunah erawh a la harh viau a, thil a ei that tak loh avangin a chau chho ta zel a. Ni 2/2/2012 chawlhni zing dar 6 vel atang khan biak theih lohin a awm ta a. Oxygen pek chhoh a ni ta a. A’n tha lailawk leh a, chaw te pawh tha takin a ei thei zel a. Amaherawhchu nimin zing atang khan a rawn chau leh ta a, tukin zing dar 3 bawr vel atang khan a rawn chau zualin biak theih lohin a awm chho zui ta a, zing dar 8:40 vel khan min lo kalsan ta a ni. A dam loh chhunga a sawi ber leh a lawmna ber chu Kohhran leh khawtlang mipui ten an hmangaihna leh duhsakna an lantir thin hi a ni a, mite thatnate phu lo a intiin a lawm thiam em em thin a. Dawrpui Kohhranah kher a hun tawp thleng a hmang hi a lawmna tizualtu ber a ni.
A THLARAU NUN : Chhandamna chungchangah hian chiang leh nghet a inti ve em em thin a. A tleirawl chhuah tirhin chhandam nih inhriatna neiin, harhnain a nuai zingah tel vein taksa chetna leh tawnghriatlohte pawh a lo dawn ve tawh thute hi a sawi tui ve thei hle thin a. Pathian hlate hi a tuipui thei em em thin a ni.
Tuna a natna Cancer a ni tih a inhriat tirh pawhin “Ka thin a phu eih lo, engkim in ta a ni min ti a, ka vui lo” a ti bawk a ni. 6 March, 2012 zing khan tawngtai rawh u a ti a, amah pawh a inpeih ang takin hahdam takin ni 7. 3. 2012 Lalpa hnenah min lo kalsan ta a ni.