NCZ Welfare 3rd Rising day Lawm

Dt.25.8.2018 (Inrinni) khan Millions Resort, Lawipu-ah NCZ Welfare Dawrpui chuan a dincham vawi 3-na chu ropui takin an lawm a, NCZ Welfare dincham hi a dintirh aṭangin kumtin an lo lawm tawh ṭhin a, kumin pawh hian an phur hle, Picnic-naah hian Bus leh Motor te engemawzat nen an thawk chhuak ani. Thlen hlimah hunserh neih a ni a, Upa Lalbiaktluanga’n hunserh hi a hmang a. Nilengin intihhlimna naupang aṭanga puitling thlengin neih a ni a, an hlimin an phur tlang hle,  chanvo hrang hrang neitute te an fakawm hle bawk. 

Tlailamah hunserh neih ani leh a Pu Vanlalbika Chairman, NCZ in he hun hi a kairuai a, Upa Lalbiaktluanga’n hunserh ṭawngṭaina a nei leh a, hetah hian Vanapa Section Dawrpui YMA-ten lawmpuina thilpek an hlan bawk, NCZ lucky coupon vawr hunte neiin tlai lamah ruai mi 150 velin an ṭheh thei ani, he huna lokal zawng zawngte chungah leh mahni mawhphurhna ṭheuh tlin taka thawktute chungah an hruaituten lawmthu an sawi mawlh mawlh e.   

       NCZ Welfare-te hian an area-ah faina kawngah hmasawnna alo awm theihna atan nasa takin ṭan an la ṭhin a, an area-a dawrkai leh Bazar-a chawhmeh zuarte leh chhungtin ten faina kawnga hma an sawn theihna atan lehkha thuziakte sem ṭhinin an area hmun tamtakah faina thuziak Sign Board pawh an tar ani. Hei bakah faina hnatlangte nei ṭhinin, Mike horn hmangin an area dawrkaite hnenah faina chungchang zirtirin an au ṭhin bawk, an area hmun hrang hrangah bawlhhlawh bawm lian (Plastic) an hunga. Nikum khan Aizawl Municipal area chhunga faina kawnga ṭan la nasa berte zingah telin pawisa leh thuziak Citation an lo la tawh bawk. An area-ah ruihhlo dona kawngah ṭan nasa takin an la a, duty-te nei ṭhinin an ṭangrual hle.