Tawng

Mihringte hi kan tawng a kan inbe thei a. Hemi ri rawn chhuahtirtu hi eng dang vak a ni bik lova, kan hrawk kawrawng 1 inchs vela zaua intanna ka chhung tawpah hian a awm a, chumi kawngah chuan hrui (Duar) pahnih a inthlung a. Chhemthei, mau kawrawng hmawrah rubber band a kawrawng lai zawn velah insi lovin bat la, han pawt la a ri tang tang mai ang. Chutiang chiah chuan Vocal Chord kan tih mai, he hrui pahnih hi kan tawng apiangin a inkhak ri a, a inkhak nat dan azirin ri a siam ta a, chu chu thluakah an thawn phei a, thluaka computer folder an va hawng a, hmangaihna lam aw nem a nih chuan chu Folder-ah chuan an thawn a, thinrim tawng chu thinrim tawng dahna folder-ah an pe phei a, an nin eng nen nge inmil tih an lo en zung zung a, an hmuh veleh a ri tichhuaktu Folder lamah an thawn leh a, awmze neiin
a lo ri chhuak ta thin a ni.

Chuvangin kha hrui kha a dul emaw, a vung emaw a nih chuan thluakin a rik dan milpui a rawn dah chhuak a, aw chhang te kan lo neih phah a ni. Mut lai tih loh chuan chawlh reng nei lovin a in khak reng a ni ber. A hrui a mam, mar nalh a, a inkhak ri a nal zaih chuan zaithiamte an lo ni ta mai a ni. Chuti lova, kuhva leh vaihlo nena i chiahpiah reng chuan a ri a dik thei thin lo. Natna hrikte tan inthlah punna tha alo ni bawk si a, hrawk-na a chhuak duh em em a, che reng a nih vang hian Cancer-na chance pawh a tam bik. Mizoah phei chuan pumpui leh hrawk cancer hi kan ngah ber reng a ni.
Khi khi kan tawng theih dan kalphung a ni a, chuvangin chinai, sahdah, vaihlo leh tuibur tea tibal lovin fai takin inkhak ri sela kan tan a that rualin, Cancer thlengin a veng thei a ni. Dangawkte pawh hi an hrawka hrui kha a mar dan a inang lova, pakhat a mar laiin pakhat a dul a, chu chu thluakin dah mil turin buai takin folder hrang hrang an hawng teuh a, a ri anpui an hmuh meuh chuan folder sang chuang an in pass chhawng tawh a, an bei rei lutuk tih an hriat avangin rang takin tawng riknaah an thawn phei a, rang deuhin an tawng ta phut thin a ni.
Chuan kan tum berah lut ta ila, heng hrawk leh a bul vel hi fai takin awm reng sela, Chinai, sahdah, khaini, tuibur leh vaihlo khu tea ti bal lo hian siam ila, na kan nei tlem deuh ang. Kan Lalpa fakna hmanrua ber a ni bawk a, Pathian fakna hmanrua chu fai taka dah ngei tur niin a lang. Kan Pathian hian chinai, khaini, sahdah kai luaia fak hi a lawm ber lovang tih i ring ve em?