Andrew-a kan chan ta

Andrew Zothansanga John (44) hi P.P. John leh Lianthawmi John te fa pali zinga a naupangber dawttu a ni a. Civil Hospital, Silchar-ah December 7th, 1966 khan a piang a. An unau hi mipa pathum leh hmeichhia pakhat an ni.
Andrew-a hi naupan tet atanga hrisel lo leh bawrhsawm tak a ni a, a lo puitlin hnu pawhin taksa lamah harsatna a tawk nasa hle a. Sikul a luh tantirh atangin St. Edmund’s School, Shillong-ah pawl 6 thleng a kal a, high school erawh chu St. Paul’s High School, Aizawlah lutin 1984 khan H.S.L.C. Distinction-ah passed-in Mizoram pumah 3-na a ni. St. Xavier’s Junior College, Mumbai-ah P.U. science a zir a, hetatang hian B.Com chu Hrangbana College, Aizawlah a zir a. Hei hi zir puitling ta lovin anmahni Company ah Basic Engineering Course, Cummins India Ltd, Pune atangin a zir zo leh a. Hemi hnu hi chuan
an chhungkaw sumdawnnaah hun pumin a tel ve ta a. A hnathawh na ah hian fak a hlawh thin hle. Kum 2004 atang khan ama pualin Johnson Diesel Sales & Services, Dawrpui a mi hi a enkawl ve ta a ni.
31st May, 1991 ah khan Lalrinpuii d/o Rozamliana (L) nen an innei a, 12th December, 1995 ah khan fanu, Isabella Lalmalsawmi John an nei a. An fanu hian tunah hian Kodaikanal International School-ah pawl 9 a zir mek a ni.
Andrew-a hmalakna pawimawh tak mai kan sawi hmaih hauh loh tur chu kum 2005 atang khan ruihtheih thil a chaklo te tan an lo dam khawchhuah theih na tur ni a beiseiin tunah hian Durtlang ah New Haven Halfway Hostel a siam a. Hei hi mi tam takin dam khawchhuah nan an hmang a, an tangkaipui hle a ni.
Kum 1995 atang khan pum lam that lohna hi a nei tan a, hemi hnu atang hi chuan a khat tawka damdawi in luh a ngai ta zauh zauh fo a. Tun tumah pawh hian 14th December, 2010 khan Presbyterian Hospital, Durtlangah an lut a, 16th December khan Stroke avangin ICU ah dahluh a ni zui ta a. CT Scan-te tih a ni a, hetah hian a thluak a thisen zam atangin bleeding awm chu hmuh a ni a. Nimahsela a lo nasa lo hlauh mai a, a vanneihthlak hle a ni. Nikhaw hriain, biak theihin leh kut leh ke pawh chet theiin a awm a. A dinhmun en hian doctor te pawhin beiseina an nei sang hle a. 25th Dec, 2010 (Krismas Ni) phei kha chuan ICU atanga chhuah ngenin doctor ten darkar khat lai ward pawna len chhuah an phalsak a. Hetianga beiseina sang tak kan neih lai hian, 26th Dec. zing atang khan a pum a puar a, a thawk a harsa ta a, internal bleeding a lo nei a lo ni a. Hmanhmawh takin thisen ngaihtuah a ni a. Durtlang YMA te phei chuan Pathianni khan thisen pe tur sawmin an tlangau hial a. Thisen unit 13 zet hmuh a niin lak a ni ta a. Tin, a bak lak mai theih pawh mi engngemaw zat an inpe bawk. Hetianga enkawl chhoh anih lai hian ni Dec 27, tlai dar 4-ah chatuan ram a lo pan ta a ni.