Pu Nunzira kan chan ta

Pu F. Lalnunzira, Kum 48 (Ex-VCP) s/o Thanglawt a(L) Bara Bazar chu 14 March, 2011 (Thawhtanni) chawhma dar 10:20 khan Cancer avangin a boral a, atuk chhun dar 12:00 khan Pastor R. Vanlalnghaka'n Dawrpui Thlanmualah a vui liam.
A chanchin tlangpui : Pu F. Lalnunzira hi Dawrpui Branch YMA OB leh VC President-te pawh lo ni tawh thin a ni a, a nupui leh fate 4 a kalsan a ni.
Pu F. Lalnunzira hi Pu F. Thanglawta (L) leh Pi Lalzami te fa 7 zinga a 5-na niin 11th March1963 khan Aizawl-ah a lo piang a. Pianpui unau mipa panga leh hmeichhia pakhat a nei a ni.
Kum 1985 khan Lalhmunmawii, d/o Lalthanzuala (L) nen an innei a, fapa pakhat leh fanu pathum leh tu pali an nei.
Pu F.Lalnunzira hi pa ngawichawi, mize zawi tak, mi pawisawi ngai lo hmangaihna ngah tak leh thenrual
kawm thiam tak mi a ni. Khawtlang ah pawh a phak ang tawka thahnemngai thin a ni a, kum 1991 khan Dawrpui Branch YMA ah Asst. Secretary niin 1994 khan Fin . Secretary a ni bawk. Sports lamah pawh a tui hle a, tunhma atangin Dawrpui veng Football khaipa ber a ni thin a, a theih chin chinah a tha leh sum a ui ngai lo. Tin, tun tum Red Ribbon Football Tournament Dawrpui vengin Pre Quarter Final, Lammual-a an khelh pawh khan damlo chungin zan khaw vawt hnuaiah a fapa hruaiin ala tawiawm hram hram a ni. Tin, khawtlang tana mi tangkai tak a niin Dawrpui Village Council President niin, he hna hi Term khat a chelh bawk.
A nat tan dan : Kum 2009 July thla khan, a lei (Tongue) ah sawiselna a nei a. Ngaihthatlohna a neih avangin Shillong-a Bethany Hospital-ah an zuk inentir a. Investigation te an neih hnuin, Lei Cancer a ni tih an lo hmuchhuak ta mai a. Tichuan, Tata Cancer Research Center, Mumbai panin, hetah hian hlawhtling takin an zai a. A tha chho ve zela hriat niin, amah pawh a lawm hle a. A hnua In check-up a vawi hnih an kal pawhin result a that thu an lo hrilh nghe nghe a ni.
A natna chuan kian san ve zel tura beisei laiin March 12, 2011 (Inrinni) chawhnu lam khan a nak a nat deuh thu a sawi a. Tichuan, a tuk Pathianni zan dar 9:30 vel khan Bathroom-a a inthiar a chau ta thut mai a, Civil Hospital panpui nghal niin, damdawi In thlenpui a nih hnuah Oxygen te pawh pek nghal a ni a. Mahse, that lam a pan theih meuh loh avangin ICU-ah hemi zan vek hian sawn chhoh leh nghal a ni. Doctor leh Nurse ten theihtawp an chhuah hnuah pawh awmzia a nei vak thei lova, a taksa a chau zui zel a. Tichuan, March 14, 2001 (Thawhtanni) zing dar 10:30 khan chatuan ram min lo pansan ta a ni.