Thisen Hlu

Mihring nunna leh thlarau hi khawiahnge a awm? He zawhna hi khawvel awmtirh ata Science thiamna pawhin ala chhan fel fak theih loh a ni. A chhanna ber ni awma lang chu kan Bible-ah “Sa thisen erawh chu ei reng reng suh, nunna chu thisenah a awm si a.” tih a ni a, hei hian a hrilhfiah deuh ber awm e.
Thisen hi a hlu em em a, a tello chuan nun theih a ni lo. Tlangval sek teng tawng pawh vawi leh khatah a thisen litre 3 vel han hipchhuak se, a thi mai dawn a ni. Chutih laiin thluak te chu a lehlam paih vek pawhin an thi chuang lo. Chuvangin thisen hi kan taksa tan chaw tha, Oxygen sem darhtu, natna hrik man khawmtu leh min tinungtu a ni. Kan hriat lar em em Hb (Haemoglobin) test kan tih pawh hi thisen ti sentu a tam leh tam loh enna a ni a, a tam loh chuan mi an dang bel a, an nung sarh lo thin. Chuvangin thisen tha nei tur chuan ei leh in tih that a ngai a, thil chikhat chauh ei teuh kan ching hi a tha lo. Kan ei dan tur
tlangpui chu, Buh (Chaw) leh thlai hring, thil bul bal leh rah emaw a tel vek tur a ni. Tin, thei lampang vawikhat tal ei tel ve tum tur.
A nih leh kan thlarau chu khawnge a awm, nunna chu thlarau chu a ni ta ber em ni le? Nunna awmna lah thisen a ni si a. Keini ringtute tan phei chuan taksa leh thlarau nunna min petu chu thisen hi a lo ni. I thisenin i nunna a pe che a, Kalvari tlanga Isua thisenin i thlarau nunna a pe bawk che a nih chu. Hei vang hi a ni ang, thisen chhuah reng reng Pathianin a ngaih pawimawh, “I nau thisenin min au” a ti a. A biak buk sa tur pawhin thisen chhuah hmang Lal Davida chu a phal thak lo a nih kha.
Chutichuan, i thisen leh Kalvari thisen chu in luan zawm se, taksa leh thlarau nunna i nei mai dawn a lo ni. Chu chu i neih a, kan neih vek hunah chuan Zoram thar, Lalpa nena len dunna tlak ram kan lo ni mai dawn a ni. Hawh teh u, i ngaihtuah tlang teh ang u! Hebrai ziakah chuan, “Rinna leh thianghlimna tello chuan Pathian ram a luh theih loh” tih a ni si a. Min chhandam hian kan taksa leh thlarau leh thil siam zawng zawng a chhandam si a.
Chutichuan, kan tihtur chu thlarau leh taksa tih thianghlim a nih chu. In taksa kha Pathian In a ni tih in hre lo em ni? Pathian In chhunga Vaihlo khu, Kuhva, Sahdah, khaini, etc. dah luh chiam mai chu a dik i ring em le? Taksa leh thlarau thianghlim kan neih a ngai a nih ber chu. “Rorelna chu Pathian chhungte (Pastor, Upa, Rawngbawltute, etc.) ah hian tan a hun tawh si a.” Bible-in a ti si a. Tichuan in thil tih that te an hmu anga, in Pa Vana mi an chawimawi thei ang - TIH ZIAK A NI.