Ruihhlo hi hnam hmelma

- Vanhmingliana, Dawrpui

Chhungkaw sawprawp, keh chhia (Broken family) kan hmu thin a, kan pung tual tual lehnghal. A chhan leh a vangte zawn chhuah anih vat loh a, siamthat hna thawh thuai a nih loh chuan Hnam boralna hmahruai a ni ngei ang.
1. Kan Bible chuan, “Zu hi nuihza bura mi siamtu a ni a, zupui hi insual bung bungna a ni” a lo ti a, thu dik tak a ni. Zu hi amahin sual a ni ngawt lova, a hmangtu-in a hman thiam loh vangin suala ngaih a ni mai zawk. Chhungkaw pa berin zu ringawt a buaipui chuan, chu chhhungkua-ah chuan hlimna tak tak a awm thei lo. Chhungkaw nitin khawsak a buai a, ei leh bar tur a harsa a, chutah innghirnghona a lo chhuak lo thei lova, thin thiin a mut theih ta thin loh. A tawpah chhungkaw lu ber ve ve nupa chu an lo inthen ta nge nge thin. An fate Lalpa laka an rochante chu thlabar leh mangangin an lo seilian ve ta thin a, chu chu a ni chhungkaw kehchhia lo pianna bul chu.
2. Insumtheihna hi thlarau rah a ni e, ti a sawi a nih laiin insumtheihlohna erawh hi chuan
chhiatna tinreng a thlen bakah, hriselna - kan damchhunga ro hlu ber a khawih pawi thuai thin. Mahni tam lam phu tawka India rama ‘Ber’ kan kaina HIV Positive te, Cancer tihte hi kan ruihhlo - Drugs, Zu, zuk leh hmuam khawih nasat lutuk avanga kan hlawh a ni tlangpui. A tha ber chu, nu-in nau a pai lai atanga engmah ruih theih thil tih loh hi a ni a, a naute nen khan thawkna leh thisen inzawm vek an nih avangin. Eng thingpui leh Coffee-ah pawh hian tur chak tak Caffeine a awm avangin hengte thleng pawh hian tih loh vek hi a him ber.
3. Drugs leh zu addict tawh tak tak hi chu mi rinawm an ni thei tawh lo. Mihring hi thil pakhata kan hlutna leh pawimawh ber chu ‘Rinawmna’ hi a ni. Thiam nei tlem deuh pawh a rinawmna i hriat miau chuan i duh tlat reng ang.
4. Mizote hi kan damchhung hi a va tawi sawt em! kan pi leh pute kha chu damrei tak tak sawi tur an tam a, tunlai mite hi engatinge kan tlo loh tak em em nachhan hi, i ngaihtuah chiang teh ang u. NGO leh Sorkar pawhin thahnemngai taka an do tawk tawk theih lai hian insiamthain, i harh thar ang u. Lal Isua pawhin “Sualnate tihpuna a awm dawn avangin mi thenkhatte hmangaihna alo dai ang” a tih ang khan, nakin lawkah chuan mi taima tlawmngai ten an do reng peih loh hun hi a lo thleng ngei dawn a ni. Kan hnam hi hmelma dang do ngai lovin ruihhlo vang hian kan ral thuai thei a ni tih i hre thar leh teh ang u.