Pi Thuamkungi kan chan ta

Pi Thuamkungi (K-80) w/o Ch.Aikima, Bara Bazar chu Thawhah avangin November ni 6 (Inrinni) zan dar 9 khan an chhenna inah a boral a. A tuk November ni 7 (Pathianni) chhun dar 12 khan Pastor R. Vanlalngahka'n Dawrpui Thlanmualah a vuiliam.
A chanchin : Pi Thuamkungi hi Pu Keisuala leh Pi Khawtinkhawli te fa pathumna niin, kum 1930, December ni 18-ah Tlangpui khuaah a lo piang a, kum 1950, March ni 15-ah Pu Ch.Aikima nen Kulikawna Salvation Army Biakin-ah an innei a. Hemi tum hian a rualin nupa tuak sarih an innei nghe nghe a. An nupa hian Salvation Army officer niin an inneih hlim atangin rawngbawlnaah inhmang zuiin, Thiltlang leh Hmarchaltlangah te rawngawlin an awm kual a. An fa hmasaber nausen laia an hloh bak an fate chu hengte
hi an ni:
1. C.Lalhmingliana h/o Sangawii, Tuikual C
2. Lalmalsawma, Dawrpui
3. Lalhmachhuana (L)
4. C.Lalhlimpuii, Dawrpui
5. C.Lalthlamuana h/o Lallianthangi, Dawrpui
6. C.Vanlalpari, Dawrpui
7. C.Lalrintluangi w/o Vanlaldinpuia, Chaltlang
8. Thelma Lallawmzuali w/o Lalngaihawma, Dawrpui

Fa pariat bakah hian tu 12 leh tuchhuan 2 a nei a. Pu Ch. Aikima nen hian kum 1954-ah Aizawlah pemin tuna Bungkawn thlang Salvation Army hmunah hian Salvation Army khualbuk an enkawl a, chumi hnu kum 1955-ah Tuikualah pemin in leh lo te neiin an inbengbel ta a. Chumi hnu chuan an nupa hian sumdawnna an bei a. Pathian malsawmna dawngin an hmuingil viau va, dawr pawh hmun hnihah an din a, buai hma lam phei kha chuan sumdawnna lamah hian Aizawlah hming an chher hman ve a ni. An nupa hian Pathian rawngbawlna lama theihtawpa inhmang thin an ni a, kum enge maw zat chhung chu anmahni-in zin kuala thu hril tur evangelist an ruai thin a, an dinhmuna remchang zawka an hriat angin kum 1969 vel khan Presbyterian Kohhranah an lut ta a ni. Kum 1978-ah khan Tuikual Veng chhuahsanin an dawr neihna hmun Bara Bazarah hian an chhungkuain an pem a. Kum 2006 September ni 16 khan a pasal Pu Ch.Aikima’n a boralsan a ni.

Pi Thuamkungi hi a theih ang tawka Pathian rawngbawlna lam ngai pawimawh mi a ni a. A dam phawt chuan kohhran inkhawm hmaih ngai lo mi a niin, kohhran hmeichhe rawngbawlnaah pawh a theihtawp a chhuah ve thin a. Amah hi mi zaidam tak, mi pawisawi hlau mi, tawngka vina a fate pawh hau ngai lo, tawng tlem tak e ti lovin chhungkhat laina ngaihsak mi leh thenrual hui khawm thiam tak a ni a. Mi nun tlawm, tawngtai mi leh Bible ngaina tak a ni a, a hun awl tam zawk chu Bible chhiar leh tawngtai nan a hmang thin.

Amah hi nu dawrawm tak a ni nain, damlohna khirhkhanin a tlakbuak hran ngai lova. Amaherawh chu kum 2006-a an pa-in a boralsan atang khan a hriselna a lo tlahniam chhovin, kum 2008 kum tir lam atang khan insawiselna a nei tan a. Kum 2008 March ni 10 khan Civil Hospitala luh ngai khawpin a damlo ta a, chuta tang chuan tho kang thei lovin a bet ta nghal char char a. Thyroid sang a lo ni tih hmuhchhuah a ni a. Civil Hospital cabin-ah thla 4 chhung enkawl a nih hnuin, in lamah enkawl zui a ni a. Kohhran mite, chhungkhat te leh khawtlang mite lainat te pawh hlawhin, tawngtaina a dawng nasa hle a, hei vang hian a nunna pawh hi Pathianin a pawhsei sak niin a chhungte hian kan hria a ni. Mahse kum upa lam a lo nih ve tawh avanga tha chhuak hlei thei lovin, zunkawng thalo leh zunthlum te’n a tlakbuak zui a, tun hnaiah khan thawhah a nei leh ta zel a. A damloh tirh atanga lainat taka enkawltu Dr Rosangluaia’n theihtawp min chhuahsak thin a, mahse November 6 zan dar 8:50 khan hahdam hmel tak pu chungin a ngaih em em thin a Lalpa hnenah min chawlhsan ta a ni.