Home »

Tih tak takna kan mawmawh e

28 November, 2010 4 comments

Khawvelah hian mi tam takin thil ropui tak tak an lo ti tawh thin a, an la ti mek zel bawk a. Hlawhtlinna ropui tak tak lo khum tawhte hi han chhut chian chuan tih tak tak rilru pu-a bei ngat ngat thinte an ni chawk a ni.
Mizote zingah pawh hian tih tak taka bei thin kan awm laiin a tam zawk hi chu pal liam mai mai thin kan ni tih a chiang khawp mai. Khawvel thang zelah mihring kan pung tial tial a, eizawnna pawh a harsa tial tial kan ti thin. Kan thalai tam takte lehkhathiam hna hmu lo kan inti a, lehkhathiam hnathawh tur a vang kan tih em avangin hna min pe turin Sawrkar kan phut a, Sawrkarin hna an siam ta cheng a, a hmu turin kan inbuatsaih tha leh peih si lo. Hemi hian a entir chiang tak mai chu ‘kan thalaite hian tih tak takna an nei lo a ni’ tih hi a ni. Tunlai hian Mizoram Public Service Commission chuan hna chi hrang hrang, Asst Soil Conservation Officer, Asst. Engineer/SDO, Programme etc hna 30 chuang lai atan Combined Competitive Examination a buatsaih mek a, Exam tura form fill-up chu mi 3,000 chuang zet an awm. Admit Card lak chuah hunah engemaw zat chuan an la chhuak ngam lo phawt a, exam tak taka thu peih chu 1,000 chuang awrh chauh an ni ta mai. Hetih rual hian exam laia bansan mi engemaw zat an awm ziah bawk. Heng hna hrang hrang lak turte hi cheng 20,000/- chuang hlawh theihna vek leh Group ‘B’ Officer
Post an ni hlawm. Hetiang hna tha hi kan kawtkai maiah thawhrim peih chuan hmuh mai theihin a awm a, kan khua ngeiah examna hmun a awm a, kan ram chhung ngei a thawh tur a ni bawk a, chuti chung pawh a kan dil peih lo emaw kan exam tluan peih lo a nih chuan heng hna pawh hi min lo pe ta se kan thawk peih chuangin a rinawm loh a ni.
Chuvangin kan thalai lehkhathiam tam takte hi chuan tih tak takna hi an tlachham chiang mai. An insiamtha a nih loh chuan engti kawng zawng mahin an in haiveng dawnin a lang lo.Hemi kawngah hian hnam anga kan thaharh angai a, taimak kawngah hian hmasawnna kan mamawh tak zet a ni. Kan hnam hi kan la pung zel dawn a, Mizoram chhung chauh loah pawh hna kan zawn a tul hun a la awm ngei ang. Chutih hunah chuan taimakna leh tih tak takna thuam famkim nen kan thawk chhuak a nih loh chuan Mizote hian hnamdang zingah eng ruai kan ang lo mai ang tih a hlauhawm. Tun atangin chhungkaw tin ten tan kan lak sauh sauh a, kan tu leh fate dam khawchhuahna kan ngaihtuah a hun ta takzet zet e.

4 comments »

  • Zkima said:  

    'Lehkha thiam hna hmu lo' tih te hi chu tih mai mai niin ka hria. Mizoin lehkha thiam kan tih hi a hniam mah mahin ka hria. zir sang mawl ringawt hi lehkha thiam kan ti vek ringawt hi chu dik berin a lang lo. Lehkha thiam tak tak hi chu an awl lo teh a nia, Chu mai piah lamah sorkar hnathawh kan tum vek ringawt mai pawh hi inzirtirna tha lo tak niin ka hria.

  • fanai ruata said:  

    Tih tak2 na hi kan mamawh reng a ni.....tih tak2 na tello chuan hlawhtlina kan hmu dawn silo...ava thra em....

  • Leave your response!

    Han sawi ve teh le.