Kan vel leilung leh boruak leh tui te hi Pathianin kan mamawh min pe tur leh kan taksa awm dan reltu pui ber an ni a. Thenkhatin Arsi-a hrilhlawkna, Horoscope te leh thla bial leh bial loh tena kan hringnun leh taksa chhungril a khawih danglam theih zia te hi hriat loh vangin tam takin Horoscope te hi ramhuai thil, aienna ang deuhah an ngai a. Hei hi a ni lova, mihring reng reng an pian thla azirin an zia leh themthiamna te a innghat tih hi dawt a ni lova, mahse nitin a Horoscope a lehkha i hmuh ang tih vel nepnawi lutuk hi chu phuah chawp a ni tawh thin. Entirnan Leo group a mite chu Science leh kut themthiam lam an thiam bik a. Vana Arsi leh thla te hian awmzia an neih zia chu, Isua piang tur pawh mifing (Horoscope lam zirmi) te chuan an hria a, an pan mai a ni.
Hetiang anih avang hian kan vel boruakin min Control dan hi hriat ve a tha. A bikin ruhseh nei ho hi, hunpui thlasik leh thal inthen dawn laite hian a na zual a, khua a thal a, ni a sat val val lai pawha i ruh na alo chhuah chuan a tukah emaw khua a dur dawn tih i sawi lawk thei ang. Hetiang tak hian kan taksa hi kan vel boruak hian a control a. Ni sa vawl vawl te hi taksain a haw lova, chhum leh romei zam nasa kara nizung hi taksa leh mitin a haw zawk. Ni a lan chian loh hian kan taksa (A bikin Mit) tana thalo Ultra Violet Ray a tam bik a ni tih te hriat tur. Tin, ni eng hian kan taksa-ah Vitamin D a siam avangin naute piang hlim nei chuan ni khatah minute 10 vel tal ni eng hnuaiah dah thin tur. Tin, Lei hipna (Magnetic Force) hi kan thisenzam leh hriatna thazam enkawl diktu pakhat a ni. Ke lawnga lei darkar chanve tal han rah ve te hi theih sela chuan kan taksa ati hrisel a ni.
I vela Pathian thil siam dik sa nena i nun thiam loh chuan i tuar ngei ang.

Kan phu lohin Motor te hi kan ngah ta a, vaihlo nise kan tradition-in a ken, ‘Nula fel chuan tuibur a zu chawt tur a ni’ tihte a ni. Chuvangin vaihlo zuk hi a bikin Mizote hian ban harsa kan ti hle pawh hi a mawh love. Mahse tunah chuan mei zuk khapna dante kan lo nei ta a. Mitthi In, puipunna hmunah chuan mei zu khu luih luih an awm ta lova, kan vannei hle.

Chutih laiin Motor a tam telh telh a, motor khu (Exhaust) lo chhuak hi Vaihlo khu ai pawha hlauhawm, Carbon dioxide, Carbon monoxide, carbon chi tam tak a chhuak a, motor thenkhat phei chu an hnunga kal harsa khawpa khu a ni a. Hei hian vaihlo zuk ai mahin mipui tan hlauhawm a siam tam zawk. Kawng sira dawr nei tan phei chuan Cancer dawr an nghak a ni ber mai. A venna chu Transport Authority lamin dan an nei a, motor te hi a hrisel tawk em? tih te hi check-in man ve se, vaihlo khu chauh buaipui luai luai hi chu ala khingbai deuh. Mi khawpuiah chuan hetianga khu chhuak nasa lutuk hmuh tur a awm ve lo. Sorkar hian tan han la deuh sela, Cancer dona Programme chu a ni ve mai alawm. Cancer chauh lo pawh, awmna, chuap thalo benvawn a siam nasa a ni tih hi hriat ve tur.
Tlangram kan ni a, a khu hi a cham rei lo hlauh zawk a, a hlauhawm ang aiin kan la tuar nep rih zawk a ni. Dawrpui angahte phei chuan dawr leh a chhunga thil zawrh lai zawng zawng a bal vek zel thin. Chuvangin kan tih theih chuan kut hi silfai deuh reng mai tur a ni.

April 9, 2011 (Inrinni) khan Section hrang hrangte inelna thenkhat Mizo High School Field-ah neih a ni a, hemi ni hian kum dang zawng aiin member pawh kan kal tha a, a lawmawm hle mai. Item 9-ah inelna neih a ni a, Item dang engemawzat tih tur ala awm a, member-te ilo inbuatsaih zel ang u. Sport Item hi a chanve pawh kan la ti lova, Item hlimawm tak tak leh nuam tak tak tur engemawzat a la awm a, remchang hmasa berah Sports hi la chhunzawm leh tur a ni. Intihsiakna kan neih tawha kan dinhmun tlangpui chu hetiang hi a ni :-

Thal a rawn ni chho dawn a, ruah a sur hun hunah ruah sur hmasa ber hi chu tuizem a dah loh leh innan tir loh (ruah do loh) a him ber. A chhan chu thal laia boruaka natna hrik thlawk kual mai mai ho kha ruah tuiin a rawn hlawmkhawm a, natna, kawthalo leh hritlangte neih a awl bik thin.
    Tunah tak phei chuan North East Monsoon tleh hun a  ni a. Keini chuan ruah kan dawng ve lo a, tun lai hian South India-ah chuan ruah a sur zauh zauh ang. Fur kan tih hi South West Monsoon a ni a. Tuifinriat (Indian Ocean) atanga lokal a ni a, chhim thlanglam atangin hmar chhak lamah a chho a; Fur tui kan tih ber chu a ni a. North East Monsoon erawh hi chu khawmual atanga lokal hmar chhak atanga chhim thlang lam zawngin a kal ve thung  a, ruah tui a pai thei ve lo.
    Mahse, tunlaia Japan Nuclear chhia zung zam erawh hi chu he North East Monsoon hian a rawn tleh thlakpui ngei dawn a. Tunah pawh a piah lam aiin chim thlang lam Phillipines-ah a lang tawh  a ni. Asia ram te, India ram te pawhin he monsoon hi kan dawn ziah avangin tun tum kher hi chu Nuclear zung zam atel ang tih ring mai la, ruah sur leh nisa lutuk hnuaiah awm loh a him rih ang. Pawl 3 kan nih laiin kan lo byheart daih tawh a ni.
    North East Monsoon chu khawvel hmar chhak atangin a lo tleh thla a, ruah a pai ve lo a. Bay of Bengal a thlen chuan ruah a pai ve a, Kerela te, Madras te chuan ruah tlem an dawng thin. Tunlai hi a tleh hun lai a ni bawk. Tin, South West Monsoon chu India tuipui (Indian Ocean) atanga rawn in tanin, hmar chhak zawngin a tleh chho ve thung a. Chu chu June, July, August “ Fur” kan tih hun hi a ni. Miin “a hlauhawm lo,” ti ti mahse kan monson tleh dan a ni miau a, a hlauhawm ve pha mahna tih lo hre ve mai mai rawh.

- Dr Thangchungnunga, MS (Ortho)

YMA Kumpuan “Khawtlang Nun Siam That” tih leh “2011 YMA Dawrpui Branch Sport” chu April 7, 2011 Ningani zan Pu J.H. Zoremthanga, CYMA Vice. President chuan a hawng ta. He hawnna inkhawm pawimawh tak hi Pu Chhawnkima Pachuau, Branch President-in a kaihruai a, Dr. C. Zarzoliana, Sr. Adviser chuan Pathian thu chhiara tawngtai hun a hmang a. Tunlai zaithiam lar 2 Lalropuii Pachuau leh Lallawmzuali Khiangte ten thiam takin kalkhawm zaiin an awi a, fiamthu thiam avanga Zoram dengchhuak Tv. Roluaha’n kalkhawm te a tinui nasa hle.
Hawngtu Pu J.H. Zoremthanga, CYMA Vice. President chuan, khawtlang nun siam thatna kawnga ngaihpawimawh zual Do Ngai pathum 1. Ruihhlo 2. Mipat Hmeichhiatna hmansual 3. Corruption leh Nunpui tur paruk - 1. Chhungkaw tha din 2. Zonun zemawi chhawm nun zel 3. Taimak leh Intodelh 4. Ngaihsan tur dik ngaihsan 5. Ngaihhlut tur ngaihhlut thiam 6. Ram leh hnam hmangaihna tih te chu thiam tak leh uar takin tawi fel takin a sawi a, kalkhawm ten uluk taka ngaihtla in, a taka chan tir an tum hlawm niin a lang.
Pu H. Dingluaia, Vice. President chuan lawmthu (Vote of Thanks) a sawi a, Lalpa tawngtaina sawi rualin hun tih tawp a ni. Banah kalkhawm zawng zawngten Thingpui ruai tuihnai tak an changho bawk. Section kal dan inchhiar a ni a, hetiang hi Section member kal dan a ni :-
Vanapa Section : 75 Chawngbawla Section : 55 Taitesena Section : 25

Tunlai hian he natna Hepatitis C hi vei an tamin enkawlna man a to em em a, kan buaipui nasa hle. Tunhma a Hepatitis B leh HIV (AIDS) kan hlau leh lutuk a, hemi avanga thi te pawh a zan la la a phum te kan tih chuk chuk kha, tunah chuan kan hrethiam ta a. A ruang khawihtu, a thawmhnaw thlaktu leh kuanga dahtu ten Glove an bun vek ta a, ti hian a fel ta chu a ni mai a.

Hetiang deuh hian Hepatitis B hrik leh HIV hrik pai nih ringawt khan AIDS emaw, mitliam a siam a, thih mai na tur a ni lem lo tih pawh hunin a rawn hril zel a, ngaiah kan nei ta chu a ni ber mai. A phawklek zawnga kan buaipui pawh a reh ta a, a lawmawm hle. Heng natna te hi taksa a hrisel chuan an lang chhuak mai mai thei lova, ruih theih thil leh zuk leh hmuam i nghei vek chuan mi dam chen i dam ve tho tih hria la. Lungkham a Depression (Rilru beidawng) khawp a lo awm ringawt tur pawh a ni lo.
Hetiang tho hian Hepatitis C pawh hi kan buaipui em em a, a damdawi lah a to ropui si a. In enkawl thei chu in enkawl ngei tur a ni a, chutih laiin thin a tisawng thei an tih avanga buai em em tur pawh a ni lo. A chunga kan sawi anga hrisel tha nih tum la, a lang chhuak mai mai bik lo. Zu pawh thin a ti sawng thei tih kan hre theuh a, an in reng a, a sawn meuh chu nasa taka an in hnuah a ni zel. Khawvelah hian mi danglam bik, vawikhat natna hrik kai a thihpui mai nghal chi hi chu mi singah pakhat te chu an awm ve thei. Hetiang anih avang hian Hepatitis C pawh hi, Hepatitis B leh HIV hrik ang tho a thisena a luh chauha inkai chhawn theih a ni a, chuti maia awla inkai theih a ni lo tih hriat a tha. Mipat hmeichhiatna-ah an kai tam ber a, a dawt leh chu inchiuna atang te, thisen leh thisen a inpawlh a ngai a ni. A hlauhawm loh dan chu, zu leh ruih theih thil leh zuk leh hmuam ti lovin, thin huat chi sathau ei vak vak te, khawchhak thil rep ro engtia siam nge tih pawh hriat loh ei reng te, damdawi mahni thu a ei vak vak, a bikin Paracetamol te, Nemosulide te, a mum uk (Kawthalo damdawi) kan tih mai te hi insum a, a tul angte a ei chauh tur. Chutichuan Hepatitis C vangin i thi lovang.

Tunlai hian kan Thalai thenkhat inkawm nel tak takte zan rei tak thlenga khawlaia an tamtal te, a bul vela khawsa tana ninawm thama an awm thin leh an rui hial nia hriatna a lo awm thar a, hei hi a pawi khawp mai. Tin, vengdang lo sual duh mai emaw, mahni venga inti lal len deuh sawi tur kan awm ta zeuh zeuh a, kan thangmawi e, kan tih lai hian mite ngaihdan loh deuh hian Dawrpui hi kan siam ang tih a hlauhawm hle a ni. Mahni theuh in enfiah ang u. Heng zawng zawngah hian chhungkua kan pawimawh a, inchhung khurah tu leh fate inhrilh fo ang u.