Home »

Hepatitis C

10 April, 2011 3 comments

Tunlai hian he natna Hepatitis C hi vei an tamin enkawlna man a to em em a, kan buaipui nasa hle. Tunhma a Hepatitis B leh HIV (AIDS) kan hlau leh lutuk a, hemi avanga thi te pawh a zan la la a phum te kan tih chuk chuk kha, tunah chuan kan hrethiam ta a. A ruang khawihtu, a thawmhnaw thlaktu leh kuanga dahtu ten Glove an bun vek ta a, ti hian a fel ta chu a ni mai a.
Hetiang deuh hian Hepatitis B hrik leh HIV hrik pai nih ringawt khan AIDS emaw, mitliam a siam a, thih mai na tur a ni lem lo tih pawh hunin a rawn hril zel a, ngaiah kan nei ta chu a ni ber mai. A phawklek zawnga kan buaipui pawh a reh ta a, a lawmawm hle. Heng natna te hi taksa a hrisel chuan an lang chhuak mai mai thei lova, ruih theih thil leh zuk leh hmuam i nghei vek chuan mi dam chen i dam ve tho tih hria la. Lungkham a Depression (Rilru beidawng) khawp a lo awm ringawt tur pawh a ni lo.
Hetiang tho hian Hepatitis C pawh hi kan buaipui em em a, a damdawi lah a to ropui si a. In enkawl thei chu in enkawl ngei tur a ni a, chutih laiin thin a tisawng thei an tih avanga buai em em tur pawh a ni lo. A chunga kan sawi anga hrisel tha nih tum la, a lang chhuak mai mai bik lo. Zu pawh thin a ti sawng thei tih kan hre theuh a, an in reng a, a sawn meuh chu nasa taka an in hnuah a ni zel. Khawvelah hian mi danglam bik, vawikhat natna hrik kai a thihpui mai nghal chi hi chu mi singah pakhat te chu an awm ve thei. Hetiang anih avang hian Hepatitis C pawh hi, Hepatitis B leh HIV hrik ang tho a thisena a luh chauha inkai chhawn theih a ni a, chuti maia awla inkai theih a ni lo tih hriat a tha. Mipat hmeichhiatna-ah an kai tam ber a, a dawt leh chu inchiuna atang te, thisen leh thisen a inpawlh a ngai a ni. A hlauhawm loh dan chu, zu leh ruih theih thil leh zuk leh hmuam ti lovin, thin huat chi sathau ei vak vak te, khawchhak thil rep ro engtia siam nge tih pawh hriat loh ei reng te, damdawi mahni thu a ei vak vak, a bikin Paracetamol te, Nemosulide te, a mum uk (Kawthalo damdawi) kan tih mai te hi insum a, a tul angte a ei chauh tur. Chutichuan Hepatitis C vangin i thi lovang.
- Dr Thangchungnunga, MS (Ortho)

3 comments »

  • Michael Fanai said:  

    Bengvarthlak thei ngei mai

  • TS Khupchong said:  

    A bengvarthlak khawp mai. Hepatitis C vanga thi lo turah han inngai phawt teh ang!

  • A_es said:  

    Bengvarthlak thin e, han sawizui tur em em poh hre lo mah ila kan sawtpui tlang thinin ka hria

  • Leave your response!

    Han sawi ve teh le.