Pu Sailothanga kan chan ta

Pu Sailothanga Sailo hi kum 1931 Chapchar lai khan Muallungthu khuaah Pu Lalthangkhuma leh Pi Chhingteii te karah a lo piang a. Amah hi tawng tam lo tak, harhvang tak leh mi invawng tak a ni a, a hmaa tihtur awm chu hlenchhuak thin mi a ni. Hmangaihna a ngah em em a, a hrin loh fate pawh hriat hran theih loh khawpa hmangaihna tak tak nena enkawl thin a ni. March 04, 1963 khan Vanhnuaithangi D/o Nunthanga (L) Dawrpui nen an innei a, vanduaithlak takin 1992 khan a boralsan a. April 02, 1997 khan Pathianin a kawppui tur H.C. Vanlalruati, Mission Vengthlang nen Dawrpui Biak In-ah an innei a, vawiin thlengin hmangaih tak leh duat takin a enkawl a, a tu leh fate pawhin an thlamuanpui em em a ni. Fa 5 (Panga), mipa pathum 3 leh hmeichhia 2 neiin tu leh tuchhuan 16 a nei a ni.
Kum 1957 khan BSF 2nd Battalion-ah lutin, chhungkaw tulna avangin Nov. 17, 1960 khan a hna a bansan a. Kum 1962 khan Aizawl-ah lo chhuakin Police-ah a lut leh a, Inspector thlenga kaisangin kum 1991 khan a
Pension ta a ni. Sorkar hna a thawh chhung hian Mizoram leh pawn hmun hrang hrangah a awm kual nasa hle.
Pathian fak leh chawimawia zai nuam ti mi a ni a, Solfa te a thiamin Khuang vuak rawngbawlna hi Pathianin a tana a pek ropui tak a ni. Lenkhawmna mai bakah Biak In-ah zai hruaitu hlun tak a ni a, Dawrpui Kohhran-ah Puitling SS Zirtirtu, Ramthar Committee, Finance Committee, Music Committee, Social Front Committee leh thuhril rawngbawlna chanvo te a chelh thin.
Khawtlangah Dawrpui VC member ni tawhin Mizo Hnamro Chawisang Pawl-ah hruaitu hlun, President etc. lo ni tawh a ni bakah Civil Pensioner-ah pawh hruaitu a ni reng thin a ni.
Pa hrisel tak ni thinin Pathian zarah khum betin a na ngai lo. Amaherawhchu, kum 10 kalta atang khan a vun thak leh bawl a buaipui tana, Doctor te rawnin a inenkawl thin. Kum 2009 khan chesual palhin a hnungzang ruh a tina a, hun engemawchen pawn chhuak thei lovin a awm a, hemi atang hian natna hrang hrangin a tlakbuak a, hemi avang hian Kohhranah leh khawtlangah pawh a inhmang thei ta lova. A kal (Kidney) ding lamin hna thawk tawh lovin tuna a natna thisenzam pui (Artery) block hian a rawn tibuai leh a, May 18, 2011 khan AMRI Hospital, Kolkata-ah refer niin natna chi hrang hrang Thling Cancer, Thin chaklo leh ruh mawih (Osteoporosis) te hmuhchhuah niin, chung natna te chuan zual lam pan zelin June 7, 2011 (Thawhlehni) khan Chatuan ram alo pan ta a ni.