Rothangpuia kan chan ta

Rothangpuia Sailo (61) hi Saitawna Sailo (L) leh Lalkili Renthlei te fa paruk zinga pali-na niin ni 19.12.1949 khan Thiltlang khua-ah a lo piang a. Ni 27.01.1984 khan Lalthakimi Ralte nen innei in fa pathum an nei.
Thiltlang Middle School-ah Class VI a zir zawh hnuin 1963 ah Don Bosco Technical School Boarding, Shillong-ah kum 4 awmin Matric tha takin a zo a, Don Bosco a zirlai hian Vocational Subject-ah Tailoring (puanthui) a la a, he School-a a zir chhung hian nungchang tha ber lawmman a la a ni.
Heta puanthui a zir zawh hnu hian puanthui hna thawkin Shillong-ah a thiante nen inluahin an khawsa a, kum 1971 khan Mizoram-ah lo chuang chhuakin an unau zain Aizawl ah an in bengbel a. Puanthui dawr, Don Bosco Tailoring hawngin thahnem a ngai thei em em a, chu a dawr chu tilian zelin kum 1991 khan Dry Clean khawlte a bun ta hial a, chu chu tun thleng hian an la chhunzawm ta zel a ni.
Rawngbawlna lam : Kum 1979 khan an unauin Chhandamna Sipai Pawl-ah in pe in Aizawl Bazar Corps-ah an awm a. A phak tawkah theih tawp chhuaha rawngbawl thin mi a ni a, Kum 1993-ah Local Officer (Welcome
Sergeant) ah Commissioned niin a hun tawp thlengin he rawngbawlna hna hi a chelh a ni.
Corps a rawngbawlna-ah hian thalai hruaitu leh Songster Leader te lo ni tawhin rawngbawlna-ah nasa takin a thatlai hunte a hmang thin a. Amah hi zai ngaina mitak niin Central Division Songster bul tan tute zingah pawh a tel a ni. Kum 1990-ah khan United Kingdom hmun hrang hrangah zaia rawngbawlin a kal a, kum 1991-ah Salvation Army Scout & Guides Meet, Scotland-ah a kal leh a, heng bakah hian hmun hrang hrangah rawngbawlna neiin vawi tam tak a kal chhuak thin a ni.
A natdan : Kum 2004 atang khan zunthlum leh thisen sang hi a nei tan a, vanduaithlak takin kum 2010 khan a fapa Lalsangliana Sailo in a boral san a, a fapa thihna hi a tuar em em a, a natna pawhin a zual phah a, 2010 Krismas ni khan Damdawi In-ah dahluh a ni a, hemi ni a tang a a thihni thleng hian thlakhat pawh In ah awm lovin a hun tam zawk chu Damdawi In ah hian a hmang a ni. Tichuan, a fapa Lalsangliana Sailo thihcham ni 23.09.2011 atang khan a kaih tan a, a biak theih ta lova. Tichuan ni 27.09.2011 chawhnu dar 01:50 p.m. khan Van Kohna min lo chhan san ta a ni.