Thingpui sen hang-II

Kan sawi a, kan sawi nawn leh dawn a ni ber mai. Thingpui sen hang hi taksa tan a tha em em a, a that lohna an la hre meuh lo. Tunhma deuha kan ngaihruat, hmanlai kan pi leh pute kha cancer an vei ve nasa tho ang kan tih kha, a lo ni dawn lemlo niin a lang. A chhan chu inleng apiang leh eng hunah pawh thingpui sen hang kha an lo in reng a, kha khan tunlaia kan buaipui tam ber pumpui pan (Ulcer), Cancer, thin thip tihte hi thingpui sen hang hian a veng vek mai a lo ni. Tuna an proof theih chinah chuan, pumpui na (Ulcer) a ti dam thei a, Ulcer tur a veng bawk a, taksa-a Cancer awm tur a veng bawk. Thisen dawt a tifai tha a, Lung (Heart) tihrawl a tichak a, thluak a tifim a, hriat reng theihna te a siam tel bawk. Heng lo pawh hi a thatna chu, kal (Kidney) tan a tha em em a, thingpui sen hang (A paw thlum ni lo) i in tam zawh poh leh i kal (Kidney) a chakin, a chhihri (Bawlhhlawh paih chhuahna) a tifai tha em em a, a tam thei ang ber in mai tur.

Zing thawh hlima pum no nghulh, thin thip lek lek te i nei anih phei chuan, mu chungin thingpui sen hang han siam tir la (Tak tha pangngaiin) han in pawp pawp la, lak sawn ang hmiahin a reh thei a ni. Heti taka tha hi chu nilenga a tam thei ang ber in tum mai tur. Thingpui thlum, bawnghnute pawlh hi zing thawhah han in chiah teh i pum chu a na ni chiah lovin, pai nuam lo hrehawm takin i awm mai dawn a ni. Tin, bawnghnute pawlh hi tumah ngeih tak tak kan awm lo tih hriat tur, naute pawhin a ngeih chuang lo.Chuvangin i BP sang, pumpui na, lung chak lo te, kal tha vak lo te thingpui sen hang hian a ti tha theiin, cancer te a veng thei a ni tih hriat chian tawh hi chuan in tam i tum mai teh ang u. A theih phei chuan thingpuife hi keimahni (Mizoram) siam ngei an zawrh hi hmang thei ila a tha lehzual. A chhan chu phai lam siamah hi chuan a chhiat lohna damdawi an pawlh hi taksain a ngeih lo ve thei tho a, mahse hlauhawm khawp chuan an telh ngai lo. Chuvangin hetiang awlsam leh man tlawm Cancer (A bikin Pumpui) veng thei tur hi in tam tual tual teh ang u. Tichuan, kan lo hrisel zawk dawn nia.