Tunlaia Rannung Seh

Tunlai hian rannung eng ber nge hriat loh(A in ang vek lem lova) thihpui leh ke, ban tan ngai an awm nual mai a. A chhan ber nia lang chu natna hrik a awmna apiang eichhe nghal, darkar 24 chhunga taksa fan chhhuak thei khawpa chak hi natna hrik pangngai zingah hian an lo piang ve zeuh zeuh thin a. Hetiang natna hi ‘Necrotising Fascitis’ kan ti a. Hetiang natna hrik taksaa a luh tawh chuan, an ke a a seh a nih chuan darkar 12-ah a duk chhe vek a, a ni thumna-ah an thi lo a nih si chuan ke tan emaw paih emaw a ngai tawh thin. Heti taka rang leh nasa hi kan hmu zeuh zeuh a, dam chhuak pawh an awm ve tho. An ke (Bawp) lehlam kap atanga ke hmawr thlengin darkar 72 chhungin a tawih vek thei a ni. Heti taka Bacteria natna hrik hlauhawm bikte hi a tam lova. Tunlaia Terrorist abika thiamna nei leh thih ngam ang deuh hi, natna hrik tam tak zingah hian an lo insiam ru ve a, chu chu a eng bacteria pawh nise thihna emaw vun tihrawl tawihna a siam ta thin a ni.
    A venna pawh hi a awm hran lova, mi vanduai bikin an kai a ni ber a, a kai dan pawh rannung seh, hling chhun leh vangvat zuk te hi a tam ber an ni a, mi sing telah pakhat pawhin a vei meuh lo. Mahse kan hriat reng tur chu HIV+ ho emaw AIDS vei inhre si lo te, zu in nasat lutuk avanga thin chhe zo tawh te an ni deuh fur thin. Kan taksa resistance a that hle a ngai a, khing natna nei maih lo pa hrisel teng tawng pawhin
an vei tho. Chuvangin a hlau zawngin awm lo ila, kan invenna awmchhun chu kan in bul vel tihfai te, kut sil fai ngun te, thil seh, pem leh vun pawp chi reng reng chu tui luang laia silfai nghal hi a tha ber. Kut sil uar ila kan him tam ber anga, rannung sehtu tur erawh chu in bul vel tihfai that a pawimawh a ni ber mai.
    Hetiang Necrotising Fascitis hi Sapin ‘Highly Virulent’ an ti a. A awmzia chu Sipai nise, Silai leh Bomb engkim keng vek a, hmang thiam vek bawk si, thih hlau bawk si lo ‘Suicide Squad’ an tih ang hi a ni ber. Thlah pawh an inthlah pung chiam lo a ni ang, mi pakhatin a vei zeuh tih chauh hi a ni. Thil thleng thleng tam a ni lova, chiai chiam tur pawh a ni love. Pangpar leh thlai huan nei chuan kutkawr bun se a him a ni mai, pheikhawk leh mawza chu bun tur sa-ah ngai ila. He natna hi hlauh viaua chiai chiam chi a ni lo tih lo hria ang che.