Home

Chân loh khâna lo chhuak

25 April, 2017 0 comments

Aizawl khawpui tana kawng duhawm leh chhenfakawm tak ni reng thin kha, kan zawh ve pha ta si lo! Sipai lane tlem te, a bang lung, a chung rangva a awm zeuh zeuh, sipai chhungkaw chenna tih bak chu Bethlehem, Venghlui ramri thlengin ngaw thla vek a ni a, a nuam em em a ni. Chuta zu zuk in ru leh drugs a lo inchiu an awm lo. Khap miah loh a ni a tumah an kal peih lo. Khap bur ni se chu kal tum talh pawh an lo awm mahna, thil tam tak hi kan khap itawm mai ni te pawhin a lang. Zoram chu 1966 –ah rambuai a puan a lo nih tak avangin sipaiin tlawhpawh an duh ta lova, gate an siam a, kan kal thei lo chu a ni ta reng mai, vawiin ni thlengin, a va pamhmai em!
Tlaizawng : Sipai Quarter Guard saw eng dang atana siam a ni lova, lungin tâng dahna hmun a ni thin ngei mai. MNF man te pawh tam tak tah sawn khung an ni. Anmahni sipai te inhremna hmun a ni ber mai. Chhuahlamah sawn a in tak pan chhohna leh Assam Rifles office leh anmahni sipai tan bik Canteen panna kawngchho saw tun thleng pawn a la awm reng a, saw erawh saw chu mipui vantlang tana hawn a ni ngai lo, an veng deuh tlat thin. A kawngsir tawn tawnah sawn Sap ho bawk tihchhuah kha a ni ngei ang, Tlaizawng kung an phun tlar chho thût mai a, Krismas laia a par vul lai tak tak chuan sap ram emaw tih mai tur hial
khawp a mawi leh fai si a ni thin. Lammual pawh chhuk zawl nuam tak a thlir phakna a lo ni. Helai kawng chho ka thlir hian thildang daih ka rilruah a lo lang ta a.
Sipai hi an hotu te thleng hian an lungleng ve theiin an awm tawhna post a an thlalak te hi neih an duh ve hle thin a, chu tak chu thlalatu Vankhama tan pawh hun remchang lo ni vein a damchhung leh a thih hnu thleng pawha a tana rohlu pakhat lo pianchhuahna a lo ni ve reng mai. Pathian thil rel dan hi a va mak em! Hriat phak rual loh a ni.
Thlalatu Vankhama chu thlasik vawh lai tak mai chuan Sipai Quarter Guard hmuna thlala tura a kal hnuk hnuk mai chu, thlalak ai maha a rilru suangtuahna thinlung lo la peng tu Tlaizawng kung lo par vul chuk mai chu hmachhawnin a ding ta reng mai a. A thinlungah chuan chu pangpar mawi tak mai a hmuh chuan chu pangpar siamtu chu a thinlungah a lo lian phawt mai a, “Siamtu chawi reng par” tiin a’n vuah phawt mai a. Chutah khawvel mi te zawng zawngin an ur vut vut mai ‘Lal pian hun champha(Krismas)’ tia an sawi hunlai a lo ni vei bawk nen. Ziahna tur dang nei si lovin, a sikret bawm pawt thetin, a thlarau pawl lai thlah phal tawh bawk si lovin, hla duhawm tak mai “Tlaizawng Par” tih chu kum1952 khan a lo piang ta hlawl mai a. Amah hi Staff Notation (ulawng solfa) thiam tak anih avangin a rem fel nghal mai bawk a ni awm e. A ngaihtuah hre ve si lova a thlalak nghak tu te tan chuan a rei duh awm mang e te ka lo ti mai mai a! A mawi ti lutuk si, par vul rei lo hle tura ngai bawk siin ti hian hla in a lo thlah ta anih kha!
“Vulmawi, I lenlai a tawi lua e, 
Tan chhawn ang thle nghial virthli lengah;
Chung thla puan ang a lo thar anga,
Vulmawite uaiin a lo til ang;
I pam em chul leh uai mai tura’n,
Tharin kum sulah lo vul leh la;
Aw, engah mawi tin thang dang zawng pawh,
Chul thei tura Khuanu’n a lo siam le.”
Ramchhungah buaina (insurgency) a lo awm anih chuan sipai hi an lal em em reng a. Invenhimna chungchang hi a pawimawh a, an tih tur awm reng pawh a ni e. Buai hmaa duhtawka civilian te tualchai ve na, mahse buai hnu a tlawh ve theih tawh loh thu kan sawi a ni a. Tunah chuan rambuai pawh kan ni tawh lova, engah mah Assam Rifles hian hman tangkaina pawh an nei tak tak si lova. Aizawl tana a pawimawh dan thung erawh hi chu sawiin a siak lo. Traffic tan khawmna junction pawimawh a ni a, kawng pakhat chauh inchuh lo a, kawng thiang hi ni khat atan chauh ni lo, a tur ve reng atan hmang thei tawh ila. Kha ni, August ni 18, 2016 hriatreng nan khan hmang thei ila tih hi ka duhthusam a va ni tak em! Kan thian te ah an inchhal mai bakah, anmahni insawi dan ang ngeiin ‘Friends of Hill People an nihzia chu a takin tilang ve tawh se la!
Tichuan, August ni 18, 2016 chu mahnia khawtlang lunglen hmanna ni nen, ram leh hnam veina ni nen, chan loh khanah lo chhuakin chu ni chu danglam takin ka hmang nileng ve ta anih chu. He kawngpui hi hmang chhunzawm leh thei turin kan sawrkar hian Central defence beng thleng zak thei turin hma la se la a va duhawm dawn em!    

-Vanhmingliana(Taua)

0 comments »

Leave your response!

Han sawi ve teh le.