Home »

Pi Ronguri kan chan ta

21 September, 2009 6 comments

Pi Ronguri w/o V.L.T. Muana Dawrpui 'S' chu kalna avangin Kolkata-ah September ni 19 zan khan a boral a. Ni 21 September, 2009 (Thawhtanni) chhun dar 12 khan Pastor R. Vanlalnghakan a vuiliam.

A chanchin : Pu Rokhuma Ralte Siakeng (Thangruma & Sons) leh Pi Lalbiaki Hmar (Asst. Matron Rtd.) te fa upa ber ni turin July 4, 1946 khan Aizawl Civil Hospital-ah a lo piang a. An unau hi 6 an ni. May 27, 1965-ah Pu VLT Muana nen inneiin fanu pathum leh fapa pakhat an nei.
Zirna leh Hnathawhna Lam : Dawrpui School-ah Primary leh Middle a zo a, 1968-ah HSLC a zova, hemi kum atang hian School of Nursing, Ganesh Das Hospital, Shillong-ah kum 4 chhung General Nursing & Midwifery a zir chhunzawm a ni.
Kum 1971-ah Assam Nursing Services-ah lutin, Silchar Medical College-ah Staff Nurse hna a thawk tan a.1972-a khan Aizawl Civil Hospital-ah transfer a ni a. 1980 atangin Public Health Sister niin Civil Surgeon’s Office Lunglei-ah a thawk leh a. Hemi kum vek hian District Chief Medical & Health Officer’s Office (DCM&HO) Aizawl-ah a awm lehin, June-August 1985-ah PHN Tutor General Nursing & Midwifery Training School, Aizawl-ah deputation-in a kal a. Chumi hnuah Public Health Nursing Officer-ah kaisangin DCM & HO Office Aizawl-ah a thawk leh a, Mizo hmeichhe zinga hetiang thawk hmasa ber a ni. 1998-99 khan Asst. Nursing Superintendent DHS ah transfer niin 2004 khan Nursing Superintendent ah kaisang leh in Civil Hospital Lunglei ah a va awm leh a. 2005 atanga a pension (July 31, 2008) thlengin Civil Hospital Aizawl-ah Nursing Superintendent hna a thawk a ni.
Kohhran leh Khawtlang Lam : A boral hian Puitling S.S. Zirtirtu a ni a. Kohhran Hmeichhe Committee Member a ni mek bawk. Dawrpui MHIP Committee Member tanglai a nih bakah MHIP Dawrpui South Group Leader a ni mek bawk.

A nat dan tlangpui : Kum 1996-ah a chhul paihsak a ni a, damdawi ei reng tura tih a nih laiin kum 2 lai chu a ei tawh lo. Kumin-ah hian insawiselna a nei ve ta zeuh zeuh a, a beng leh Sinus leh awmna te avangin CMRI (Kolkata)-ah kumin February thla khan a in check-up a, tha takin a lo haw a ni. August thla atang khan a chhuak peih ta meuh lova, August 25 atang phei kha chuan a chau zual ta hle a, “Ka thi thei mai anga” tiin tawngtai sak te a duh fo thin. August 29 zanah CARE Hospital-ah dahluh a ni a, Doctor ten a natna hi Thyriod niin an hria a, theihtawpa an enkawl chung pawha that lam a pan theih loh avangin ama beisei angin CMRI (Kolkata)-ah an refer a, Sept 8, ‘09-ah Kolkata panin investigation te an tih hnuah a Kal (Kidney) in hna a thawk lo tih hmuhchhuah a ni a. ICU-ah dahluh nghal a niin Heart Attack a nei zui leh ta zel a, hemi atang hian nikhaw hre lovin a awm zui ta a ni. Doctor ten theih tawp chhuahin Dylysis leh Oxygen te an pe reng a, Ventilator hmangin an thawktir reng bawk a. MRI (Brain), CT Scan leh X-Ray te tih a ni a, hetatang hian a chuap-ah Lymphnodes (Thal Be) thahnem tak hmuh a ni a. A taksa peng hrang hrang hnathawk tha thei lovin a siam a, Doctor-te pawn hetiang natna hi natna vang tak leh enkawl buaithlak tak a nih thu an sawi nghe nghe. Darkar tinin zual lam a pan tak zel avangin Doctor leh Nurse ten theihtawp an chhuah chungin Sept 19, zan 10:50 khan Lungaihna leh natna awm tawh lohna ramah min lo kalsan ta a ni.

6 comments »

  • Unknown said:  

    A va uihawm ve,nufeltak a nih vei nen,kan tuarpui takzet a ni. A Pasal Fanaute Lalpan awmpui tlat rawh se.An Nu a in nghat thin ten Pathiana an in nghah theih nan kan lo tawngtai pui ve ang e. Zonunsiami te chhungkua Mumbai.

  • A_es said:  

    @Zonunsiami. I t lawmawm e, kan lo hrih ang e, mhse an hre thei ang che ngem le??

  • ice said:  

    Ka ui, ka ui takzet, ka tana tha tur duh em em rengtu a ni a, ka thianpa nu a nihna mai bakah ka tana tongtai thintu a ni. Pu Muana leh a tu leh fate Lalpa'n awmpui rawh se....

  • htta said:  

    A kalsan tak a chhungte Pathianin vengin thlamuan zel rawh se.

  • A_es said:  

    Shillong-a a fate lehkha zir a awmpui thin laia kan han len a minlo duhsak thin ziate kha min ti hre chhuak...nufel leh inchenvawng tak aniinka hria.
    A kalsan tak a chhungte Pathianin awmpui rawh se.

  • Leave your response!

    Han sawi ve teh le.