Home »

Thlanmual-Kum 99-a upa

11 September, 2009 6 comments

- ice
Mi tam takin, Dawrpui Veng hi “Aizawl ti Aizawl tu a ni” an ti thin, a ni tak a, Bazar hmunpui anih avangin khaw dang atanga Aizawl kalte pawhin Dawrpui Venga an bazar loh chuan Aizawl kalah an inngailo hial thin! Sorkar Damdawi In awmna a ni a, Mizoram Police Station lian ber awmna a ni bawk, heng bakah hian Dawrpui Veng hian pawimawhna tam tak a neih avangin kan thlanmual hlutna chungchanga rilrua awm thenkhat te i'n sawi ve thung teh ang.

Aizawl-a Veng dang tam takte ang bawkin Dawrpui Veng hian kan thlanmual tawt tawh lutuk chu kan buaipui a. Dawrpui Veng atang hian veng engemawzat an lo indang tawh a, chung zinga veng engemawzat chuan an indan hian thlanmual dang nei chuanglovin Dawrpui thlanmual hi min tawm zui zel a, kum 1910-a hman tan, Dawrpui thlanmual chu a lo tawt ta hle a, a kum 99-na, kum 2009-ah chuan thlanmual thar kan ngaihtuah a lo ngai ve ta hial a.
Thlanmual hlu a ni :
Dawrpui thlanmual hi Hla phuah thiam-Vankhama te, Zaipawl hla lar tak, ‘Inthen hnute kan intawk leh ang’ tih te Kristian Hlabu-a hla lar tak ‘He khawvelah hlim leh muanga ka thut laiin’ (KHB No. 514) tih hla leh hla dang engemawzat phuahtu-C.L. Thanga te, Kristian Hla bu lama thawhhlawk tak-Zawngauva (C. Dinthanga pa) te, Mizo Zaipawl hlapui ropui tak 'Ram eng mawi' tihte leh hla dang tam tak phuahtu-Vanmawia (Remkimi Cherput pu) te, Unau zaithiam, David-a te Unau hming putu-David Lalthantluanga te, Zaithiam-F. Lalnunfima te, Mizo zinga M.A. pass hmasaber-Khawtinkhuma te, leh Mizo sumdawng hlawhtling hmasa-Pachhunga, Buangthanga, Lalhema etc. te, Pastor hmasa-Pastor Thanga te, Mizoram Chief Minister hmasaber-Ch. Chhunga te leh Minister anih laia chatuan ram pan ta-Aichhinga te leh mi pawimawh dang tam tak an zalhna hmun a ni a. Heng kan mi hmasa Mizo hnam Arsi lian te thlan hi a hlu tulh tulh dawn a ni.

He kan thlanmual hlu tak hi a lo tawt tak viau si-ah chuan hmun dang kan dap a lo ngai ve ta a, thlanmual thar tur chu Mualpui ram-ah, tha tak mai kan nei ta, a lawmawm kher mai.
.....lo’ng maw? :
Kan thlanmual hi lo tawt ta viauin thlanmual thar hi kan hman hunte lo thleng pawh ni se, Tuna Dawrpui Thlanmual hi a la hlu dawn chauh a, a awmna a laili a, a sir kual tin maiah nek sawr in a awm mek a, veng thenkhat thlanmual hluite anga In a din khah mup maite pawh a hlauhawm thei hialin a lang a. Kan hruaitu fel tak takte hian Mizo mipuite mai nilo, ram dang atanga lo kal khualzinte tan pawha tlawh chakawm khawpa siam dan kawng zawng sela a va duhawm em! A hmun a rem a, tunah phei chuan ralkhat atanga thlir pawhin a ngaw khup mai a, Green area kan mamawhna hrechiangtu kan hruaitute hian a ngaihna an hre ngei ngei ang. A pumin a theihlo a nih pawhin a chung zawl chin tal khu chu thlan hungnate thiat vekin, thlan lung te pawh inang tlang deuha siama, hmuhnawm leh tlawh chakawm tham khawpa siam tura tun atanga ngaihtuahna sen tan a tha lo’ng maw?
A chungzawl-ah zel aw? :
A hming tumtu Dawrpui hian kan thlanmual hman mek hi a tawt tawh avangin a chungzawl tlansanin a mawng lam kan hmang ta deuh ber a, kan thlanmual min tawmtu veng dangte hian min renpui ve lemlo nge...a chungzawl tha lai apiangah thlan an lai mai zel thung a, a neitu zawkina a hla lam pan pan mai hi a tul lem em ni tih mai palh a awl rum rum mai a...?

6 comments »

  • A_es said:  

    @ice : Hetianga ngaihtuahna tha tak seng Dawrpui Thalaiah ilo awm hi a vanneihthlak tak meuh e.

    Ni e, tuna Dawrpui Thlanmual hi a la hlu dawn chauh, ram dang atanga lo kal khualzinte tan pawha tlawh chakawm khawpa siam dan kawng zawng chu thil duhawm tak ani.

    Min tawmtute hian min renpui lutuk lo maithei a, chuvang chuan keini pon theihtawpin a humhalh leh veng mi inphumna chungchangah poh hian kan harh chhuah viau a tul khop mai.

  • A_es said:  

    Ice, I zarah thu bengvarthlak tak kan lo hriat phah ve a, hetiang lam hi rawn ti zeuh² thin ang che.

  • htta said:  

    Thlanmual hi enkawl that a pawimawh hle. Thlanmual tawt avanga hmun danga insawn a nih thin avangin a bula chengten thlanmual area pelin insak, huan leh lo ram nei an awm thin an ti. Chuvang thlanmual area hi vantlang kawngin a tan tlang lo a nih chuan hung te pawh hi a pawi lo mai thei a ni. Kan hmangaih tak kan chhungte thlan awmna a nih si a.

  • Michael Fanai said:  

    Ka pu hming leh ka papuia hminga lang ve tlats mai

  • Leave your response!

    Han sawi ve teh le.