Home »

Eizawnna atanga Natna

05 November, 2011 1 comments

Kawng sira welding : Kan kawng a te-in a zim a, kawng sira Workshop siam pawh an tam mai a. He thil hi, a bikin Welding (Thir char zawmna) hi mihring tana hlauhawm tam tak a awm ve a. Chung zinga a tha lo ber, thir an kahzawm laia eng pawl tek chuai chuai thin hi Ultra violet ray (Light) a ni a. Mit hian a haw em em a, kawng sira an lo ti anih pawhin en lo hram hram ang che. Ni awk lem a hlauhawm an tih thin ang tho zungzam kha a ni. A khawihtu phei chuan a venna tarmit a bika siam a hmang ngei tur a ni a, chuti a nih loh chuan mit hnung lamah hian nerve hriatna thazam chak em em mai a awm a, hei hi a va en chhe thei a, mit fiah lo, mit chak lo emaw lu na te a siam thei thin. Tin, a bul hnaia awm phei chuan vun natna hrang hrang pawh a siam thei bawk.
In rawng hnawih : Mahni In rawng hnawih that te hian zanah tukverh leh kawngka te hawn vek a, boruak chhuak tam thei ang ber hi a ngai tih hriat tur. A rawnga an telh damdawi hi chuapin a haw em em a, rawng hnawiha inhlawh phei chu hmui leh hnar tuamna vuah reng a tha. Rizai siam leh heng lapua lam chi khawih pawh hi a kum tluana khawih tan chuan hmui leh hmai tuam ngei ngei tur. Asthma te, chuap chaklo te a siam hma bik.

Motor khu & Mobile kekawra ah : Tin, heng Zion Street chho te, Bazar pheia dawr nghak, kawng dung ami reng reng hi nilengin Motor khu - Carbon Dioxide leh a dangte an hip lut reng tih hriat sa a ni a, thangkhat lian meuh an thut chuan chuap lam diklo an nei chawk thin. Tin, tunlai a kan hman loh theih loh, Mobile Phone hi kekawr ipte-a ah mai hi style chikhatah tleirawl ho hian an nei a. Hei hian nupui pasal an neih hunah fa nei thei lo tam tak a siam ang tih a hlauhawm hle.
Computer : Tin, Computer hi a tel lova kan awm theih si loh, mahse mitin a ngeih loh em em a ni a, hman rau rau chuan Antiglare chi hrang hrang a awm a, in ven ve tum deuh a tha. Tunlaiah phei chuan naupang tarmit bun lo aram pawh an awm ta mang lo te hi ngaihtuah ngun deuh hlek a tha. Video Games khelh vak vakte hi mitin a tuar nasa tih hriat sa a ni. Mobile Tower bul vela mite phei chu kum 10 a vei hunah eng tak ni hlawm ang maw!!?
- Dr Thangchungnunga, MS (Ortho)

1 comments »

  • Anonymous said:  

    Eizawna tinah risk a awm vek alawm. Model te pawh hi an makeup hman hian that lohna a nei ang a.

  • Leave your response!

    Han sawi ve teh le.