Home »

Pu Lalchungnunga thusawi tlangpui

05 November, 2011 1 comments

Kumin YMA General Confence Vawi 66-na, 2011 Kolasiba neiha President kalchhuak tur Pu Lalchungnunga thusawi tlangpui han tarlang ila:

ZONUNMAWI : Bus-ah i chuanga, i bula ding, seat chang ve lo kha engatinge ni seat-ah i thut tir? bus fare a tumsak che em ni? tumsak lo, nang aia a upat avangin i zah a, i seat i kian mai a ni. Ruaithehnaah chaw dawh turin i intlar a, i ril pawh a tam ve tawh, mahse i hnunga putar chu i kiana, i dawh hmasaktir thin. Hei pawh eng dang vang mah a ni lo, i Zonun zemawi lo lanchhuah vang a ni. Zinnaah mi motor chhia a lo ding a, motor chhe siam thiam miah lo chunga “engtizia nge”? ti a i din chilhna chhan pawh Zonun Zemawi hawihhawmna nangmaha nung reng kha a lo chhuah vang mai a ni.
Zing dar 2 a ni tawh a, mitthi dar ri val val chuan i muhil tui lai a tiharh che a, YMA tlangau in tunge thi, engvanga thi nge tih a rawn puang a, vanneihthlak takin i chhungte an ni lo hlauh mai. Mahse i muhil zui thei ta lo va, chutiang ang hunah chuan tanpui ngaite tanpui turin ruahsur hnuaiah pawh ke i pen thin. I exam hun a hnai, a nih loh leh a tukah i hnaah i kal ngei ngei a ngaih chunga mitthi lumena tlaivar tlat si pawh em-i-mi, zet-o-zo Mizo
i nih vang bawk a ni, kan sawi seng lo vang.
He nun ze mawi kan neih ang hi khawvelah tu hnam mahin an nei ve lo tih hi khawvel fang chhuak tawh te sawi a ni. He thil tluka mawi leh tha ram danga thawn chhuah tlak, he hnam hian a nei hauh lo. Vawngnung zel i la, thangthar te i zirtir zel ang u.
Shillong-a lehkhazir kan in tihhmuh tantirh lam khan Khasi ho chuan Mizote chuan mitthi an lawm a, tui tak leh hlim takin ruang an zai tlaivar pui a, a tukah phurtakin thlan an lai leh thin min ti. Mitthi lumena, hlimviau thu a awm lo va, thlanlaih phur viau thu a awm hek lo, kan mizia an hre lo a ni. Kumin kum tir lam khan Tlungvel tlangval pakhat a bo va, nasatakin khawtlangin an zawng a, mibo zawng tlangval tlawmngai hnatlangte zanah an lo hawng a dawrkawnah nulaten thingpui nen an lo hmuak a, papakhat chu lo ding chhuakin 'Mizo kan ni kan hmel a tha' tih hla thu hi a sawi a, mibo zawng tlangval tlawmngaite hmel kha tha a ti hle a ni, rikrum thil a lo thlen a kan fuankhawm thuai thinte, damlo mangangte hnena a thlawna thisen kan pe thin te, hmeithai in kan sak sak thinte leh tanpui ngaite YMA ten kan tanpui thin hi a ropuiin a hlu reng a ni.
Ngaihtuah ngun ngai ta chu, a chunga kan sawi tak te khi tuna kan dinhmun, tuna kan mizia te a la ni em?! tih hi a ni.
Vawikhat YMA programme hmangin thintlang khuaah ka zina, Aizawl zaithiam rawn hruai hram ang che an tih avangin mipa pakhat leh hmeichhe pakhat ka hruai a. Kan haw lamah chuan pitar kum 70 mi ka phur tel a, chu pitar chuan motor hi ka rui leh thin, tukverh bulah ka lo thu ang nge a ti a. Ka zaithiam hruaite chuan motor an rui lo, mahse an kian duh lo. Aizawl City Bus-ah hian a awm nem zawk hmeichhia hrim hrim chu sawi loh, ai upa tar chaklo seat kian thei lo, ken tur a nih tih pawh hre lo, high school naupang chu sawi loh, college zirlai leh thalaite zingah an va tam teh lul em! Mizo zia hre lo thalai duhaiin kan pung chak ta, a pawi a ni. An mahni thiamloh vek a ni lo ang. A zirtirtu nu leh pa thiamloh ani tel ang.
Ei leh inah hian, tuhlai hian Mizo zia hawihhawmna a lang pha lo bawk. Ai upate kenna chang kan hre lo tlangpui. Dr. Specialist pawhin en se nula tlangval, nangzawng i hrisel e an tih ngei ngeia hrisel si, eng mitthi dar mahina a kaihharh zawh loh muthlu thalaite zingah an pung zel hi pun na tha a ni lo bawk. A thu hrimah, eng mitthi dar mahin kan thin a thawng ta miah lo mai hi a mak ta a ni. Tun hma chuan thih dan rapthlak deuha thi an awm chuan Zoram a deng chhuak thin a nih kha.
Mizo nih ti nuamtu te leh Krisitan zirtirna lan chhuah tir tu kan nun ze mawi, mi zawng zawng tana entawn tlak kan neihte hi kawvel hriata kan hming ti thang mawitu a nih zel theih nan uar leh zualin i chawinung zel ang u khai.

1 comments »

Leave your response!

Han sawi ve teh le.